Xalq deputatlari viloyat va tuman Kengashlari deputatlarining 2026-yil birinchi yarim yillik faoliyati yuzasidan saylovchilar oldida axborot berish reja-grafigiga muvofiq, Xalq deputatlari Farg‘ona viloyati Kengashi deputati A.Sharipov hamda Xalq deputatlari Bag‘dod tumani Kengashining “18-Do‘rmancha” saylov okrugi deputati A.Umurzoqov tomonidan “Do‘rmancha” mahalla fuqarolar yig‘inida saylovchilar bilan ochiq muloqot uchrashuvi o‘tkazildi.

Tadbirda Xalq deputatlari Bag‘dod tumani Kengashi Kotibiyati mudiri, O‘zLiDeP Bag‘dod tuman Kengashi apparati rahbari, O‘zbekiston Ekologik partiyasi Bag‘dod tuman Kengashi raisi, shuningdek, tumandagi tegishli tashkilot va korxonalar rahbarlari hamda mahalla faollari ishtirok etdi.

Uchrashuv davomida deputatlar tomonidan 2026-yilning birinchi yarim yilligida amalga oshirilgan deputatlik faoliyati yuzasidan batafsil axborot taqdim etildi. Xususan, Xalq deputatlari Kengashlari sessiyalarida ko‘rib chiqilgan dolzarb masalalar, qabul qilingan qarorlarning mazmun-mohiyati, deputatlik so‘rovlari va ularning ijrosi, saylovchilardan kelib tushgan murojaatlar bilan ishlash natijalari hamda saylov okrugidagi mavjud muammolarni bartaraf etish borasida amalga oshirilgan ishlar haqida ma’lumot berildi.

Shuningdek, hududni ijtimoiy-iqtisodiy rivojlantirish, yangi ish o‘rinlarini yaratish, infratuzilmani yaxshilash, obodonlashtirish ishlari hamda fuqarolarning qonuniy manfaatlarini ta’minlash yo‘nalishida deputatlar tomonidan ilgari surilgan tashabbuslar va ularning natijalari keng yoritildi.

Muloqot jarayonida mahalliy Kengashlarning vakolatlari, deputatlarning qonunchilikda belgilangan huquq va majburiyatlari, fuqarolar murojaatlarini ko‘rib chiqish tartibi hamda zaruratga ko‘ra davlat organlariga deputatlik so‘rovlarini yuborish mexanizmlari yuzasidan ham batafsil tushuntirishlar berildi.

Uchrashuv yakunida saylovchilar tomonidan bildirilgan taklif va murojaatlar tinglanib, ularning yechimi yuzasidan tegishli mutasaddilarga vazifalar belgilandi