Nurafshon shahar Kengashining navbatdagi sessiyasi: mas'ullar hisobotlari va istiqbolli rejalar

Bugun Nurafshon shahri hayotida muhim o‘rin tutuvchi Xalq deputatlari Kengashining navbatdagi 19-sessiyasi bo'lib o'tdi. Unda deputatlar tomonidan shaharning bugungi holati, istiqboldagi rivojlanish yo‘nalishlari hamda aholi manfaatlariga daxldor dolzarb masalalar keng muhokama qilindi.

✔️Yig‘ilish davomida O‘zbekiston Respublikasi Prezidentining 2025-yil 3-yanvardagi PQ-1-sonli qarori ijrosi doirasida shahar prokuraturasi tomonidan amalga oshirilgan ishlar yuzasidan axborot berildi.

✔️Shuningdek, 2026-yilning I-choragi davomida hududda jinoyat va huquqbuzarliklarning oldini olish borasida bajarilgan amaliy ishlar va istiqboldagi rejalar xususida shahar Ichki ishlar boʻlimi boshligʻi A.Yuldashevning hisoboti tinglanib, mazkur yo‘nalishda kelgusida amalga oshirilishi lozim bo‘lgan vazifalar ham belgilab olindi.

✔️Shuningdek, shahar hokimligi va shahar korxona va tashkilotlarida topshiriqlar ijro holati ko‘rib chiqildi. Aholi takliflari asosida shakllangan loyihalarni moliyalashtirish, ularning ichidan eng dolzarblarini tanlab olish jarayonlari ham muhokama markazida bo‘ldi.

✔️Ta’lim sohasiga ham alohida e’tibor qaratilib, umumta’lim maktablarida inklyuziv ta’lim tizimini joriy etish bo‘yicha amalga oshirilayotgan ishlar yuzasidan mas’ullar hisobot berdi. Bundan tashqari, shahar tibbiyot birlashmasining joriy yil birinchi choragidagi faoliyati ham ko‘rib chiqildi.

Sessiyada deputatlar tomonidan kun tartibidagi har bir masala chuqur tahlil qilindi hamda bildirilgan taklif va mulohazalar inobatga olinib, hududni yanada rivojlantirish, aholining yashash sharoitlarini yaxshilash hamda islohotlar samaradorligini oshirishga qaratilgan tegishli qarorlar qabul qilindi.