Tashrif davomida bolalar tarbiyasi va ta’limi uchun yaratilgan sharoitlar, muassasaning moddiy-texnik bazasi hamda ta’lim jarayonining tashkil etilishi atroflicha o‘rganildi. Shu bilan birga, tarbiyalanuvchilarning sog‘ligi va xavfsizligini ta’minlash, ovqatlanish sifati hamda sanitariya me’yorlariga rioya etilishi ko‘zdan kechirildi. Mazkur o‘rganishdan ko‘zlangan asosiy maqsad davlat maktabgacha ta’lim tashkilotlarida bolalar hayoti va sog‘lig‘ini muhofaza qilish, yong‘in xavfsizligi, elektr xavfsizligi, sanitariya-gigiyena talablari hamda umumiy xavfsizlik qoidalariga rioya etilishi holatini kompleks tarzda tahlil qilishdan iborat bo‘ldi. O‘rganish jarayonida 3-sonli davlat maktabgacha ta’lim tashkilotida mavjud sharoitlar batafsil ko‘zdan kechirildi. Xususan, yong‘inga qarshi vositalarning mavjudligi va yaroqliligi, evakuatsiya yo‘laklarining ochiqligi, favqulodda vaziyatlarda xodimlarning harakatlanish tartibi, elektr jihozlaridan foydalanishdagi xavfsizlik choralariga amal qilinishi o‘rganildi. Shu bilan birga, muassasadagi sanitariya-gigiyena holati, oziq-ovqat mahsulotlarini saqlash va tayyorlash jarayonlari, oshxona va yordamchi xonalar tozaligi ham alohida e’tiborga olindi. O‘rganish davomida aniqlangan ayrim kamchiliklar yuzasidan tegishli mutasaddi tashkilotlar vakillariga aniq tavsiyalar berilib, ularni bartaraf etish bo‘yicha zarur chora-tadbirlar belgilandi. Xususan, yong‘in xavfsizligi vositalarini yangilash, elektr tizimlarini nazoratdan o‘tkazish, sanitariya talablariga rioya etilishini kuchaytirish, xodimlarning malakasini oshirish va muntazam monitoring tizimini yo‘lga qo‘yish zarurligi qayd etildi. Shuningdek, tadbir davomida bolalar hayoti va sog‘lig‘ini muhofaza qilish davlat siyosatining ustuvor yo‘nalishlaridan biri ekani alohida urg‘ulanib, bu borada barcha mas’ul tashkilotlar o‘rtasida samarali hamkorlikni kuchaytirish, profilaktik ishlarni tizimli ravishda olib borish muhimligi ta’kidlandi. Yakunda bunday o‘rganish ishlari muntazam davom ettirilishi, har bir maktabgacha ta’lim tashkilotida xavfsizlik talablariga to‘liq rioya etilishi ta’minlanishi lozimligi qayd etildi. Bu esa o‘z navbatida bolalarning sog‘lom, xavfsiz va zamonaviy sharoitlarda tarbiyalanishiga xizmat qiladi.