Uchrashuv davomida O‘zbekiston Respublikasi Prezidentining 2025-yil 20-oktabrdagi PQ–310-sonli "Favqulodda vaziyatlar organlari faoliyatini yanada takomillashtirishga doir tashkiliy chora-tadbirlar to‘g‘risida"gi qarori ijrosi doirasida amalga oshirilayotgan ishlar ko‘rib chiqildi.

Xususan, qarorda mahalla fuqarolar yig‘inlari binolari va huquq-tartibot maskanlarida davlat inspektorlarining "Mahalla muhofazasi" xizmat xonalarini tashkil etish, "mahalla yettiligi" vakillarining aniq vazifalarini belgilash hamda ularning faoliyatini muvofiqlashtirish tizimini joriy etish belgilanganligi alohida ta’kidlandi.

Shundan kelib chiqib, Marg‘ilon shahridagi "Yuksalish", "Ipak yo‘li", "Qirguli", "Zuhro", "Baxrim", "B. Marg‘iloniy", "Tog‘liq", "Orol bo‘yi", "Tut tagi" va "Do‘stlik" mahalla fuqarolar yig‘inlarida davlat inspektorlarining "Mahalla muhofazasi" xizmat xonalarini zarur jihozlar bilan ta’minlash masalasi muhokama qilindi.
Muhokamalar davomida mazkur xizmat xonalarini kompyuter jamlanmalari, stol va stullar, shuningdek, xizmat hujjatlarini saqlash uchun shkaflar bilan jihozlash bo‘yicha takliflar ko‘rib chiqildi. Qayd etilishicha, bunday sharoitlarning yaratilishi davlat inspektorlarining faoliyatini samarali tashkil etish, mahallalarda xavfsizlikni ta’minlash hamda profilaktik ishlarni yanada kuchaytirishga xizmat qiladi.
Uchrashuv yakunida deputat va mas’ul xodim kelgusida o‘zaro hamkorlikni yanada mustahkamlash, mavjud muammolarni birgalikda o‘rganish hamda ularning yechimi yuzasidan amaliy choralarni izchil amalga oshirish bo‘yicha kelishib oldilar.