Xalq deputatlari Bo‘zatov tumani Kengashining 2026-yil 13-fevraldagi VIII-19-15-13-216-K/26-sonli "Bo‘zatov" shaharchasi fuqarolar yig‘inlari hamda "Qusxanatov" va "Erkindaryo" qishloq fuqarolar yig‘inlarini "Yangi O‘zbekiston qiyofasi"ga o‘zgartirish bo‘yicha chora-tadbirlar dasturini tasdiqlash to‘g‘risidagi qarori ijrosi yuzasidan deputatlik nazorati doirasida navbatdagi o‘rganish ishlari olib borildi.
O‘rganishda Xalq deputatlari Bo‘zatov tumani Kengashining 7-sonli "Qutli makon" saylov okrugi deputati Q. Jamalov hamda Kengash kotibiyati boshlig‘i A. Ibragimov ishtirok etdi.
Tashrif davomida "Erkindaryo" OFY hududida "Yangi O‘zbekiston qiyofasidagi mahalla" dasturi asosida amalga oshirilayotgan qurilish, obodonlashtirish va infratuzilmani rivojlantirish ishlari ko‘zdan kechirildi. Xususan, hududni obodonlashtirish, ichki yo‘llarni tartibga keltirish, muhandislik-kommunikatsiya tarmoqlarini yaxshilash hamda aholiga qulay shart-sharoitlar yaratishga qaratilgan loyihalarning amalga oshirilish jarayoni joyida o‘rganildi.
Shuningdek, qurilish ishlari sifati, belgilangan muddatlarga rioya etilishi hamda tasdiqlangan chora-tadbirlar dasturida belgilangan vazifalarning bajarilishi yuzasidan mas'ul tashkilotlar vakillari bilan muhokamalar o‘tkazildi. Aniqlangan masalalar bo‘yicha tegishli tavsiya va takliflar berilib, ishlarni sifatli va o‘z vaqtida yakunlash yuzasidan zarur ko‘rsatmalar bildirildi.
Xalq deputatlari Bo‘zatov tumani Kengashi tomonidan mazkur qaror ijrosi ustidan deputatlik nazorati izchil davom ettiriladi.