O‘zbekiston Respublikasi Prezidentining 2025-yil 27-dekabrdagi PQ-393-son qaroriga asosan Investitsiya dasturiga 2026-yilda amalga oshirish bo‘yicha kiritilgan tumanning “Xo‘jaobod” mahallasida  joylashgan 30-sonli umumta’lim maktabining kapital ta’mirlash ishlari Xalq deputatlari Bo‘stonliq tumani Kengashi raisi O.Babayev va kotibiyat mudiri J.Sadirov tomonidan o‘rganildi.

🟢O‘rganish davomida maktabda kapital ta’mirlash ishlari umumiy hisobda 95 foizga bajarilgani ma’lum bo‘ldi. Ayni vaqtda ta’lim muassasasida o‘quvchilar uchun qulay va zamonaviy shart-sharoitlar yaratishga qaratilgan keng ko‘lamli ishlar amalga oshirilgan. Jumladan, isitish tizimi to‘liq yangilangan, maktab binosida quyosh panellari o‘rnatilgan, sinf xonalarida ta’mirlash va pardozlash ishlari yakunlangan. Xonalarning ichki ko‘rinishi zamonaviy talablarga moslashtirilib, o‘quv jarayonini samarali tashkil etish uchun zarur sharoitlar yaratilmoqda.

🟢Shu bilan birga, ayrim elektr-montaj ishlari, xususan, sinf xonalariga yoritish vositalarini o‘rnatish va elektr tarmoqlarini yakuniy sozlash ishlari davom ettirilmoqda.O‘rganish jarayonida qolgan ishlarni belgilangan muddatlarda sifatli yakunlash, elektr va yoritish tizimlarini to‘liq ishga tushirish, ta’mirlash ishlarida xavfsizlik talablariga qat’iy rioya etish hamda obyektni foydalanishga qabul qilishga puxta tayyorlash masalalariga alohida e’tibor qaratildi.

🟢Mas’ullarga maktabda olib borilayotgan so‘nggi ishlarni jadallashtirish, aniqlangan kamchiliklarni bartaraf etish va obyektni belgilangan muddatda sifatli holda foydalanishga topshirish bo‘yicha tegishli tavsiyalar berildi. Ma’lumotlarga ko‘ra, 30-sonli umumta’lim maktabidagi kapital ta’mirlash ishlarini 15 avgustga qadar to‘liq yakunlab, obyektni foydalanishga topshirish rejalashtirilgan.