Xalq deputatlari Zarbdor tuman Kengashi raisi, 1-Bo‘ston saylov okrugidan saylangan deputat Anvar Aralov tomonidan Zarbdor tumanidagi Jizzax viloyati Maktabgacha va maktab ta’limi boshqarmasiga qarashli 1-sonli kar bolalar maxsus maktab-internati pedagoglari bilan uchrashuv o‘tkazildi.
Uchrashuv davomida pedagog xodimlarga O‘zbekiston Respublikasining 2024-yil 1-fevralda qabul qilingan “Pedagogning maqomi to‘g‘risida”gi O‘RQ-901-son Qonunining mazmun-mohiyati keng tushuntirildi.
Xususan, qonunda pedagoglarning kasbiy faoliyatini amalga oshirishdagi huquqlari, sha’ni va qadr-qimmatini himoya qilish, ijtimoiy qo‘llab-quvvatlash choralari, mehnat faoliyati uchun yaratiladigan shart-sharoitlar hamda ularning kasbiy rivojlanishini ta’minlashga qaratilgan kafolatlar belgilab qo‘yilgani alohida ta’kidlandi.
Shuningdek, pedagoglarni o‘z kasbiy faoliyatiga aloqador bo‘lmagan ishlarga jalb etishga yo‘l qo‘yilmasligi, ularning qonuniy manfaatlarini himoya qilish davlatning muhim vazifalaridan biri ekani, ta’lim sifatini oshirishda pedagoglarning o‘rni va mas’uliyati haqida atroflicha fikr yuritildi.
Muloqot davomida pedagoglarni qiynayotgan masalalar tinglanib, ularning taklif va mulohazalari yuzasidan ochiq fikr almashildi.