Xalq deputatlari Chilonzor tumani Kengashi deputati Saidova Shukrona To‘xtayevna tomonidan Nafosat mahallasi hududidagi mavjud ijtimoiy infratuzilma masalalarini hal etish, aholi uchun qulay sharoitlar yaratish hamda bo‘sh turgan obyekt va yer maydonlaridan samarali foydalanish yuzasidan yuborilgan deputat so‘roviga Chilonzor tuman hokimining birinchi o‘rinbosari – tuman iqtisodiyot va moliya bo‘limi boshlig‘i Abdukadirov Mirzoxid Abduvaxabovich tomonidan rasmiy javob taqdim etildi.

Ma’lumki, deputat so‘rovida mahalla hududidagi 58-uy yonida joylashgan egasiz binoni mahalla fuqarolar yig‘ini balansiga o‘tkazish hamda 6a-uy yonidagi bo‘sh yer maydonida zamonaviy fito-bar tashkil etish imkoniyatlarini ko‘rib chiqish masalalari ko‘tarilgan edi.

Chilonzor tumani hokimligining ma’lum qilishicha, amaldagi qonunchilik talablariga muvofiq:

🔹 egasiz mulk obyektlari tegishli tartibda rasmiylashtirilib, tuman hokimligi balansiga qabul qilinadi hamda keyinchalik belgilangan tartibda realizatsiya qilinadi;

🔹 bo‘sh turgan yer uchastkalari tadbirkorlik va shaharsozlik faoliyati uchun elektron onlayn-auksion savdolari orqali ajratilishi nazarda tutilgan;

🔹 Toshkent shahar hokimining 2026-yil 18-maydagi qaroriga muvofiq, poytaxt hududidagi egasiz mulklar tuman hokimliklari balansiga rasmiylashtirilib, keyingi bosqichlarda auksion savdolariga chiqarilishi belgilangan.

Shu munosabat bilan hokimlik tomonidan deputat so‘rovida ko‘rsatilgan egasiz bino hamda bo‘sh yer maydonini to‘g‘ridan-to‘g‘ri mahalla balansiga o‘tkazish yoki ajratish imkoniyati mavjud emasligi, mazkur obyekt va yer uchastkalari amaldagi tartib asosida auksion savdolari orqali realizatsiya qilinishi mumkinligi bildirildi.