INFRATUZILMA LOYIHALARINING IJROSI DEPUTATLAR EʼTIBORIDA

Mamlakatimizda “Kambagʻallikdan farovonlik sari” dasturi doirasida aholi
bandligini taʼminlash, tadbirkorlikni rivojlantirish, ijtimoiy himoyaga muhtoj
oilalarni qoʻllab-quvvatlash hamda fuqarolarning farovonligini oshirishga
alohida eʼtibor qaratilmoqda.

Mazkur yoʻnalishdagi ishlarni yanada takomillashtirish maqsadida Oʻzbekiston
Respublikasi Prezidentining 2025-yil 30-yanvardagi “Aholini ijtimoiy himoya
qilish tizimini moliyalashtirish tartib-taomillarini takomillashtirish
toʻgʻrisida”gi PF-17-son Farmon qabul qilinib, aholini ijtimoiy
qoʻllab-quvvatlash va kambagʻallikni qisqartirish boʻyicha yangi mexanizmlar
joriy etildi va ushbu farmon ijrosi doirasida tumanda qator amaliy ishlar
bajarilmoqda.

Xalq deputatlari Quva tuman Kengashi kotibiyati mudiri R.Nodirov, hududdan
saylangan deputat M.Axmadaliyeva hamda Kengash kotibiyati bosh mutaxassisi
M.Toʻxtasinovlar tomonidan tumandagi Madaniyat mahalla fuqarolar yigʻini
hududida joylashgan Hurriyat koʻchasining 710 metr uzunlikdagi qismida olib
borilayotgan asfaltlashtirish ishlari oʻrganildi.

Mazkur loyiha tuman hokimligi huzuridagi “Infratuzilma va ijtimoiy barqarorlik”
jamgʻarmasi hisobidan ajratilgan mablagʻlar hamda mahalla homiylari tomonidan
shakllantirilgan qoʻshimcha mablagʻlar asosida amalga oshirilmoqda. Oʻrganishlar davomida qurilish-montaj ishlarining sifati, belgilangan
meʼyor va talablarga muvofiqligi, shuningdek, ishlarning bajarilish surʼati
koʻzdan kechirildi.

Taʼkidlanganidek, mazkur koʻchani asfaltlashtirish aholi uchun qulay va xavfsiz
harakatlanish sharoitini yaratish, ichki yoʻllar infratuzilmasini yaxshilash
hamda mahalla obodligini taʼminlashda muhim ahamiyat kasb etadi. Shu bilan
birga, aholi tomonidan bildirilgan taklif va mulohazalar ham oʻrganilib,
qurilish ishlarini sifatli va oʻz vaqtida yakunlash yuzasidan masʼullarga
tegishli tavsiyalar berildi.