Sessiya kun tartibiga kiritilishi belgilangan masalalar yuzasidan o‘rganish ishlari davom etmoqda

💼 Xalq deputatlari Uchtepa tumani Kengashining navbatdagi sessiyasi kun tartibiga kiritilishi belgilangan masalalar yuzasidan tegishli doimiy komissiyalar tomonidan joyiga chiqqan holda o‘rganish ishlari olib borilmoqda. Jumladan, aholini issiqlik, issiq va sovuq suv, elektr energiyasi hamda gaz bilan ta’minlash holati, shuningdek kuz-qish mavsumiga tayyorgarlik masalalari yuzasidan “Veolia Energy Tashkent” MChJ XK Uchtepa tuman boshqarmasi faoliyati o‘rganildi.

🇺🇿 Mazkur o‘rganish xalq deputatlari Uchtepa tumani Kengashining Agrar, qurilish, kommunal sohalar, ekologiya, sanoat va transport masalalari bo‘yicha doimiy komissiyasi tomonidan tashkil etildi. O‘rganishda doimiy komissiya raisi Avaz Xudayberganov, Kengash kotibiyati mudiri Anvar Usmanov hamda kotibiyat bosh mutaxassisi Umidbek Abilovlar ishtirok etdi.

📁 Taqdim etilgan ma’lumotlarga ko‘ra, 2025-yilda korxonaga 1 326 ta murojaat kelib tushgan bo‘lib, ularning barchasi ijobiy hal etilgan. 2026-yilning hisobot davrida esa 505 ta murojaatdan 498 tasi yoki 98,6 foizi ko‘rib chiqilgan, qolgan murojaatlar ijro jarayonida. Murojaatlarning asosiy qismi dispetcherlik xizmati orqali qabul qilingan.

✅ Shuningdek, 2026–2027-yillar kuz-qish mavsumiga tayyorgarlik doirasida 1 ta qozon mukammal, 16 ta qozon joriy ta’mirdan chiqarilgan. 2,67 kilometr issiqlik quvurlari yangilanib, 7,49 kilometr issiqlik tarmoqlari ta’mirlangan. Issiqlik quvurlarining izolyatsiya qoplami qayta tiklanib, tarmoq uskunalari ta’mirlangan va yangilangan.

🗣 Xususan, 12-mavzedagi ko‘p qavatli uylarni issiqlik bilan ta’minlovchi quvurlar modernizatsiya qilinib, ularning o‘tkazuvchanligi oshirilgan. Amalga oshirilayotgan ishlar kuz-qish mavsumida aholini sifatli va barqaror issiqlik energiyasi hamda issiq suv bilan ta’minlashga xizmat qilishi qayd etildi.

📊 O‘rganish yakunlari bo‘yicha to‘plangan ma’lumotlar navbatdagi sessiyada muhokama qilinadi. Doimiy komissiya tomonidan sessiya kun tartibiga kiritilishi belgilangan boshqa masalalar yuzasidan ham joylarda o‘rganish ishlari davom ettirilmoqda. Navbatdagi o‘rganish Uchtepa tumani suv ta’minoti va oqova tizimi korxonasida amalga oshirilishi rejalashtirilgan.