Doimiy komissiya raisi A.Mahkamov raisligida o‘tgan yig‘ilishda kotibiyat mudiri A.Ermatov, komissiya a’zolari, ekspert-maslahat guruhi hamda Yoshlar maslahat guruhi vakillari ishtirok etdilar.

Muhokamalar davomida O‘zbekiston Respublikasi Prezidentining 2025-yil 30-yanvardagi PF–17-son Farmoni va 2026-yil 5-fevraldagi PQ–49-son qarorida belgilangan vazifalar ijrosi yuzasidan ma’lumot berildi. Mazkur hujjatlarga muvofiq, 2026-yil 1-martdan boshlab “Ijtimoiy reyestr”ga kiritilgan, I-guruh nogironligi bo‘lgan hamda mehnatga layoqatli a’zosi mavjud bo‘lmagan oilalar xonadonlarida energiya samaradorligini oshirishga qaratilgan keng ko‘lamli ishlar amalga oshirilmoqda.

Dastur doirasida xonadonlarning tom va devorlari issiqlikni saqlovchi materiallar bilan izolyatsiya qilinadi, energiya tejamkor eshik va derazalar o‘rnatiladi. Shuningdek, quyosh panellari va geliokollektorlar bilan ta’minlash orqali oilalarning energiya xarajatlarini kamaytirish ko‘zda tutilgan.

Yig‘ilishda ta’kidlanganidek, Marg‘ilon shahrining 11 ta mahallasida joylashgan 4 ta ko‘p qavatli uy va 7 ta hovli uyda istiqomat qilayotgan “Davlat ta’minotidagi oila” toifasiga mansub fuqarolar ushbu dasturdan foydalanadi.Ta’mirlash ishlari ikki bosqichda amalga oshirilishi rejalashtirilgan.

Yig‘ilish yakunida masala yuzasidan tegishli tavsiyalar ishlab chiqilib, belgilangan vazifalarni o‘z vaqtida va sifatli amalga oshirish bo‘yicha mas’ullarga tegishli topshiriqlar berildi.