Jalaquduq tumani Tuyalas MFY hududida istiqomat qiluvchi fuqarolarni qiynab kelayotgan elektr ta’minoti bilan bog‘liq muammolar yuzasidan deputat so‘rovi yuborildi. Mazkur deputat so‘rovida Tuyalas ko‘chasining ichki qismida joylashgan 9 ta xonadonga xizmat
ko‘rsatuvchi elektr tarmog‘idagi mavjud muammolar ko‘tarildi. Xususan, hududdagi yog‘och elektr ustunlari tartibsiz joylashtirilgani sababli aholi xonadonlariga kirib-chiqishda noqulayliklar yuzaga kelayotgani, katta hajmdagi transport vositalari hamda maxsus texnikalarning harakatlanishiga to‘sqinlik qilayotgani ta’kidlandi.Shuningdek, elektr simlari texnik va xavfsizlik me’yorlariga javob bermaydigan holatda tortilgani fuqarolar xavfsizligiga jiddiy xavf tug‘dirayotgani qayd etildi.Deputat so‘rovida mutasaddi tashkilotlardan hududdagi eski yog‘och elektr ustunlarini yangi beton ustunlarga almashtirish, elektr simlarini amaldagi texnik me’yorlar asosida tartibga keltirish hamda amalga oshirilgan ishlar yuzasidan yozma ma’lumot taqdim etish so‘ralgan. Mazkur masala yuzasidan tegishli tashkilotlar tomonidan amaliy choralar ko‘rilishi kutilmoqda.