Xalq deputatlari Qo‘qon shahar Kengashida deputatlarning mahalliy darajadagi faoliyatini yanada samarali tashkil etish va ularning mas’uliyatini oshirishga qaratilgan o‘quv-seminari o‘tkazildi.

Tadbir Xalq deputatlari Qo‘qon shahar kengashi raisi O‘.Tojiyeva raisligida tashkil etilib, unda mahalliy kengash deputatlari va soha mutaxassislari ishtirok etdilar. Seminarning asosiy maqsadi deputatlik faoliyati samaradorligini oshirish, saylovchilar bilan ishlash tizimini zamon talablari asosida kuchaytirish hamda joylardagi muammolarni hal etishda xalq vakillarining rolini kengaytirishdan iborat bo‘ldi.

Seminar davomida quyidagi muhim masalalar atroflicha muhokama qilindi: Mahallalarda o‘rganishlar tashkil etish: Aholi bilan to‘g‘ridan-to‘g‘ri muloqot qilish, mahallalardagi real ijtimoiy-iqtisodiy holatni o‘rganish va bunda e’tibor qaratish lozim bo‘lgan eng dolzarb masalalar belgilab olindi.

Doimiy komissiyalar faoliyati: Shahar kengashi qoshidagi doimiy komissiyalarning ish sifatini oshirish, ular tomonidan ijro hokimiyati organlari hisobotlarini eshitish tizimini kuchaytirish zarurligi ta’kidlandi.

Qonun hujjatlari ijrosida deputatlar o‘rni: Prezident farmonlari, hukumat qarorlari va qonunchilik hujjatlarining ijrosini ta’minlash ustidan parlament va deputatlik nazoratini samarali yo‘lga qo‘yish usullari ko‘rib chiqildi.

Muloqot davomida deputatlar o‘z ish tajribalari bilan o‘rtoqlashib, mahallalardagi infratuzilma, bandlik va ijtimoiy sohalarni rivojlantirish bo‘yicha amaliy taklif va mulohazalarini bildirdilar. Yakunda mahallalardagi tizimli muammolarni o‘rganish va ularni kengash sessiyalari muhokamasiga olib chiqish yuzasidan aniq vazifalar belgilab olindi.

Xalq deputatlari Qo‘qon shahar Kengashi