Fuqarolar murojaatlari yuzasidan navbatdagi ochiq muloqot o‘tkazildi

📆 Xalq deputatlari Uchtepa tumani Kengashi kotibiyati hamda Davlat kadastrlari palatasi Uchtepa tumani filiali hamkorligida “Zarafshon” mahalla fuqarolar yig‘ini binosida navbatdagi fuqarolar qabuli tashkil etildi.

💬 Mazkur qabulda “O‘rikzor”, “Ko‘ksaroy” hamda “Zarafshon” mahallalari fuqarolari faol ishtirok etishdi. Fuqarolar tomonidan yerga bo‘lgan egalik huquqini rasmiylashtirish, mulkni e’tirof etish, oila a’zolari o‘rtasida yer maydonlarini bo‘lish, noqonuniy egallab olingan yer maydonlarini qonuniylashtirish, mavjud holatlarni huquqiy tartibga solish hamda kadastr hujjatlariga oid masalalar yuzasidan murojaatlar bildirildi.

🗣 Xususan, “Ko‘ksaroy” mahallasi Nur ko‘chasida istiqomat qiluvchi Sh.Tolipjonov, “Zarafshon” mahallasi Navro‘z ko‘chasi 72-uyda yashovchi J.Aripov kabi o‘ndan ziyod fuqarolarning murojaatlari eshitilib, ular yuzasidan huquqiy baho va tegishli tushuntirishlar berildi.

📁 Shuningdek, fuqarolarga O‘zbekiston Respublikasining 2024-yil 5-avgustdagi O‘RQ-937-sonli Qonuni mazmun-mohiyati yana bir bor batafsil tushuntirildi.

🇺🇿 Qabulda xalq deputatlari Uchtepa tumani Kengashi kotibiyati mudiri A.Usmanov, kotibiyat bosh mutaxassisi U.Abilov, Kengashga O'zbekiston milliy tiklanish demokratik partiyasidan saylangan "14-O‘rikzor" okrugi deputati Abdurashid Abdushukurov, “Madad” NNT tuman bo‘limi huquqshunosi S.Mahmudov hamda Davlat kadastrlari palatasi Uchtepa tumani filiali bosh mutaxassisi Baxtiyor Sodiqov ishtirok etib, fuqarolarning murojaatlarini tingladilar hamda kadastr yo‘nalishidagi savollarga atroflicha javob berdilar.

💼 Qabul davomida barcha murojaatlar joyida o‘rganilib, fuqarolarga batafsil huquqiy tushuntirish va tavsiyalar berildi. Yakunda murojaatlar tegishliligi bo‘yicha nazoratga olinib, mas’ullar tomonidan amaliy ko‘rsatmalar berildi.