DOIMIY KOMISSIYANING YIG‘ILISHI BO‘LIB O‘TDI 

Xalq deputatlari Quva tuman Kengashining “Agrar, suv xo‘jaligi va ekologiya
masalalari bo‘yicha” doimiy komissiyasining navbatdagi yig‘ilishi bo‘lib o‘tdi. 

Yig‘ilish kun tartibida tumanda O‘zbekiston Respublikasi Prezidentining 2022-yil
7-iyuldagi “O‘zbekiston Respublikasi qishloq xo‘jaligini rivojlantirishning
2020–2030 yillarga mo‘ljallangan strategiyasida belgilangan vazifalar ijrosini
samarali tashkil etishga doir qo‘shimcha chora-tadbirlar to‘g‘risida”
PQ–273-son Qarori ijrosi yuzasidan tuman hokimi o‘rinbosarining hisoboti
o‘rganildi. 

Hisobotda qishloq xo‘jaligi sohasida amalga oshirilayotgan ishlar, erishilgan natijalar,
mavjud muammolar va ularni bartaraf etish choralari haqida atroflicha ma’lumot
berildi. Yig‘ilish ishtirokchilari tomonidan mazkur masala yuzasidan
batafsil muhokamalar olib borilib, sohadagi kamchiliklar, ularning sabablari
hamda amaliy yechimlari yuzasidan taklif va mulohazalar bildirildi. 

Muhokamalar davomida yer va suv resurslaridan samarali
foydalanish, agrotexnologiyalarni joriy etish, fermer va dehqon xo‘jaliklarini
qo‘llab-quvvatlash, ekologik barqarorlikni ta’minlash kabi masalalarga alohida
e’tibor qaratildi. 

Yig‘ilish yakunida kun tartibidagi masala yuzasidan tegishli
qaror qabul qilinib, mas’ullarga aniq vazifalar belgilab berildi.