DEPUTATLAR TIBBIY XIZMATLAR SIFATINI OʻRGANDI 

Xalq deputatlari Quva tuman Kengashi deputatlari
M.Sayfidinov, B.Sharipov, B.Abduraximov hamda Sh.Joʻrayevlar tomonidan
tumandagi 19-son oilaviy poliklinika faoliyati atroflicha oʻrganildi. 

Oʻrganish jarayonida poliklinikada aholiga koʻrsatilayotgan
tibbiy xizmatlar sifati, dori-darmon taʼminotining uzluksizligi, bemorlar uchun
yaratilgan sharoitlar hamda tibbiyot xodimlarining xizmat faoliyatiga alohida
eʼtibor qaratildi. 

Maʼlumotlarga koʻra, mazkur poliklinika hududdagi 6043 nafar
aholiga 17 nafar malakali tibbiyot xodimi orqali tibbiy xizmat koʻrsatib
kelmoqda. 

Shuningdek, oʻrganish davomida Oʻzbekiston Respublikasi
Vazirlar Mahkamasining 2025-yildagi “Birlamchi tibbiy-sanitariya yordami
muassasalarida davlat byudjeti hisobidan qoplanadigan tibbiy yordamning
kafolatlangan hajmlarini tasdiqlash toʻgʻrisida”gi 382-son qarori asosida
ijtimoiy sugʻurta jamgʻarmasi hisobidan dori-darmon vositalari uchun ajratilgan
42 million 300 ming soʻm mablagʻning maqsadli va samarali sarflanishi ham
tahlil qilindi. 

Bundan tashqari, poliklinikaga murojaat qilgan fuqarolar
bilan suhbatlar oʻtkazilib, ularning fikr va takliflari oʻrganildi. Oʻrganish
yakunida deputatlar tomonidan poliklinika rahbariyatiga aholiga
koʻrsatilayotgan tibbiy xizmatlar sifatini yanada oshirish, zamonaviy
yondashuvlarni joriy etish, ajratilgan mablagʻlardan samarali foydalanish,
dori-darmon taʼminotida uzilishlarga yoʻl qoʻymaslik hamda murojaatlarga oʻz
vaqtida yechim topish yuzasidan tegishli tavsiya va takliflar berildi.