AHOLI MANFAATI YOʻLIDA AMALIY ISHLAR DAVOM ETMOQDA 

Xalq deputatlari Quva tuman Kengashi deputatlari B.Abduraximov, M.Sayfidinov,
B.Sharipov hamda Sh.Joʻrayevlar kotibiyat mudiri R.Nodirov boshchiligida
tumandagi 074-A “Qoʻshkechik–Pandigon” avtomobil yoʻlining ariq ustidan oʻtgan
qismida amalga oshirilayotgan taʼmirlash ishlarini joyiga chiqqan holda
atroflicha oʻrgandilar. 

Oʻrganish jarayonida mazkur hududda joylashgan, uzoq yillar davomida foydalanilgani
sababli maʼnan va jismonan eskirgan temir-beton quvurlarini holati koʻzdan
kechirildi. Shuningdek, tuman yoʻllardan foydalanish davlat muassasasi
tomonidan ushbu quvurlarni mustahkam yangi konstruksiyalar bilan almashtirish
ishlari qay darajada tashkil etilgani tahlil qilindi. 

Deputatlar tomonidan olib borilayotgan ishlar sifatli va
belgilangan meʼyorlar asosida amalga oshirilishi, yoʻl harakati xavfsizligini
taʼminlash hamda aholiga qulaylik yaratish ustuvor vazifa ekani alohida
taʼkidlandi. Shu bilan birga, masʼul tashkilot mutasaddilariga qurilish-taʼmirlash
ishlarini qisqa fursatlarda sifatli va shaffof tarzda yakunlash yuzasidan
tegishli tavsiya va koʻrsatmalar berildi. 

Mazkur oʻrganishlar hududdagi yoʻl infratuzilmasini
yaxshilash, aholi va haydovchilar uchun xavfsiz va qulay harakat sharoitlarini
yaratishga xizmat qilishi qayd etildi.