Burch, jasorat va matonat — xalq xotirasida

Bugun erta tongda Uzun tumanidagi Xotira maydonida 9-may — Xotira va qadrlash kuni munosabati bilan tantanali xotira tadbiri bo‘lib o‘tdi.

Tadbirda tuman hokimi Xabibulla Bozorov, Xalq deputatlari Uzun tumani Kengashi deputatlari, davlat va jamoat tashkilotlari hamda huquqni muhofaza qiluvchi organlar vakillari ishtirok etdilar. Harbiy orkestrning mahzun va ulug‘vor sadolari ostida Motamsaro Ona haykali poyiga gulchambarlar qo‘yilib, Vatan ozodligi yo‘lida jon fido qilgan ajdodlar xotirasiga yuksak ehtirom ko‘rsatildi.

Tadbir davomida yurt tinchligi va xalq osoyishtaligi yo‘lida mardlik ko‘rsatgan yurtdoshlarimizning nomlari yod etilib, ularning jasorati bugungi tinch hayotimizning mustahkam poydevori ekanligi ta’kidlandi.

Tuman hokimi Xabibulla Bozorov so‘zga chiqib, bugungi farovon kunlar ajdodlarimizning matonati evaziga kelganini, har bir faxriyning hayot yo‘li biz uchun maktab ekanini qayd etdi.

Xalq deputatlari Uzun tumani Kengashi deputatlari tadbirda faol ishtirok etib, hududlarda nuroniylarni yo‘qlash, ularning holidan xabar olish va e’zozlash borasidagi ishlarga alohida e’tibor qaratdilar.

9-may — Xotira va qadrlash kuni yurtimizda inson qadri naqadar ulug‘ ekanini, o‘tganlar xotirasi muqaddas, tiriklar esa e’zozda ekanini yana bir bor namoyon etmoqda. Bu kabi tadbirlar orqali tumanimiz ahlining birdamligi va ajdodlar merosiga bo‘lgan sadoqati yanada mustahkamlanmoqda.