Елимизде халықтың саламатлығын қорғаў системасын қәлиплестириў ҳәм пуқаралардың мүнәсип турмыс кешириўи ушын шараят жаратыў ушын басқышпа-басқыш әмелге асырылмақта.

Мине, усындай халықшыл сиясаттың айқын көриниси сыпатында, 2027-жыл 1-январьдан баслап Өзбекстанда онкология, жүрек-қан тамыр, руўхый ҳәм эндокринологиялық кеселликлери менен аўырған наўқаслар ушын 69 түрдеги дәри-дәрмақлар мәмлекет есабынан бийпул берилетуғыны белгиленди.

Бул жаңалық, бәринен бурын, халықтың мәплерин қорғаўды өзиниң тийкарғы ўазыйпасы деп билген Өзбекстан Халық демократиялық партиясының тийкарғы мақсет ҳәм идеяларына үнлес болып есапланады. Себеби, партиямыз бәрқулла социаллық қорғаўға мүтәж қатламлар, кекселер, майыплығы болған шахслар, созылмалы кеселликлер менен жасап атырған пуқаралардың мәплерин қорғап келмекте.

Алдын халыққа бийпул берилетуғын дәри-дәрмақлардың саны 28 түр менен шекленген болса, енди бул көрсеткиш 69 түрге жеткерилмекте. Бул болса мыңлаған шаңарақлардың емлениў қәрежетлерин сезилерли дәрежеде азайтады, олардың материаллық жүгин жеңиллестиреди ҳәм сапалы медициналық хызметтен пайдаланыў имканиятын кеңейтеди.

Партиямыз депутатлары сыпатында бизлер бул реформаны халық мәплерине хызмет ететуғын, социаллық мәмлекет принциплерин беккемлейтуғын үлкен қәдем сыпатында баҳалаймыз.

Себеби, халықтың саламатлығы – бул тек ғана медицина мәселеси емес, ал мәмлекеттиң раўажланыўы, социаллық турақлылық ҳәм келешек әўладтың абаданлығының тийкары болып есапланады.

Өзбекстан Халық демократиялық партиясы буннан былай да халық пенен бирге болып, пуқаралардың социаллық мәплерин қорғаў, бийпул медициналық хызметлер көлемин кеңейтиў ҳәм әдалатлы жәмийет қурыў жолындағы барлық басламаларды қоллап-қуўатлаўда даўам етеди.