O‘zbekiston Respublikasi Prezidenti tashabbusi bilan haftaning har payshanba kuni “Yoshlar kuni” deb belgilangani mamlakatimizda yosh avlodga bo‘lgan yuksak e’tibor va g‘amxo‘rlikning yana bir amaliy ifodasidir. Mazkur tashabbus yoshlarning bandligini ta’minlash, ularning iqtidori va salohiyatini ro‘yobga chiqarish, bo‘sh vaqtini mazmunli tashkil etish hamda hayotda o‘z o‘rnini topishiga ko‘maklashishga xizmat qilmoqda. Shu munosabat bilan joylarda turli uchrashuvlar, davra suhbatlari va amaliy muloqotlar tashkil etilmoqda. Xususan, Xalq deputatlari Jalaquduq tuman Kengashi qoshidagi “Yoshlar maslahat guruhi” a’zosi H.Latipov hamda Andijon “Suv ta’minoti” AJ Jalaquduq filiali rahbari Q.Turg‘unovlar tomonidan “Yangisor” MFY yoshlari bilan ochiq muloqot tarzidagi uchrashuv o‘tkazildi. Uchrashuv davomida yoshlarning muammo va takliflari tinglanib, ularni kasb-hunarga yo‘naltirish, doimiy daromad manbaiga ega bo‘lishi uchun yaratilayotgan imkoniyatlar haqida batafsil ma’lumotlar berildi. Shuningdek, tumanda faoliyat yuritayotgan korxona va tashkilotlardagi mavjud bo‘sh ish o‘rinlari haqida tushuntirishlar berilib, yoshlar o‘z qiziqishi va mutaxassisligidan kelib chiqib ishga taklif etildi. Tadbir yakunida yoshlar bilan bunday uchrashuvlarni muntazam tashkil etish, ularning bandligini ta’minlash va tashabbuslarini qo‘llab-quvvatlash borasidagi ishlarni yanada kuchaytirish lozimligi ta’kidlandi.