Xalq deputatlari Buloqboshi tumani Kengashi 18-“Qumariq” saylov okrugi deputati Zoirjon Nizomov Nishonovich hududning iqtisodiy drayverlaridan biri bo‘lgan sement ishlab chiqarish zavodida bo‘ldi. Mazkur o‘rganishdan ko‘zlangan asosiy maqsad —
korxonaning ishlab chiqarish quvvati, yaratilgan ish o‘rinlari va eng muhimi, ekologik me’yorlarga amal qilinishi holatini tahlil qilishdan iborat bo‘ldi. 

Tashrif davomida deputat zavodning texnologik jarayonlari, mahsulot sifati va eksport salohiyati bilan yaqindan tanishdi. Shuningdek, ishchi-xodimlar uchun yaratilgan ijtimoiy sharoitlar va xavfsizlik texnikasiga rioya etilishi masalalariga alohida e’tibor qaratildi. 

Mas'ullar bilan “Sanoat korxonalarining rivojlanishi — tumanimiz iqtisodiyoti va yangi ish o‘rinlari demakdir. Biroq, taraqqiyot bilan birga aholi salomatligi va atrof-muhit musaffoligini saqlash bizning ustuvor vazifamiz bo‘lib qoladi,” — deb ta’kidladi deputat suhbat jarayonida. 

Muloqot yakunida korxonada chang yutish filtrlari samaradorligini oshirish va hududni ko‘kalamzorlashtirish bo‘yicha tegishli
tavsiyalar berildi.