Joriy yilning 13-fevral kuni Xalq deputatlari Sho‘rchi tumani Kengashi deputati Safarova Adolat Mengdobilovna Sho‘rchi tumanidagi 42- va 53-sonli umumta’lim maktablarida bo‘lib, o‘rganish hamda uchrashuvlar o‘tkazdi. 

   Tashrif davomida ta’lim jarayonining sifati, o‘quv xonalarining jihozlanishi, axborot-kommunikatsiya texnologiyalaridan foydalanish holati, o‘quvchilarning bilim darajasi va ularning bo‘sh vaqtini mazmunli tashkil etish masalalari atroflicha ko‘rib chiqildi. Shuningdek, pedagog jamoa bilan ochiq muloqot o‘tkazilib, mavjud muammolar va ularning yechimlari yuzasidan fikr almashildi. 

   Uchrashuv chog‘ida o‘qituvchilarning fidokorona mehnati e’tirof etilib, ta’lim sifatini yanada oshirish, iqtidorli
o‘quvchilarni qo‘llab-quvvatlash hamda maktablarning moddiy-texnik bazasini mustahkamlash zarurligi ta’kidlandi. “Ilm – kelajak chirog‘i”, deydi dono xalqimiz. Darhaqiqat, ta’limga qaratilgan har bir e’tibor – kelajak sari qo‘yilgan muhim qadamdir. 

   Shuningdek, o‘quvchilar bilan samimiy suhbat o‘tkazilib, ularning orzu-intilishlari, qiziqishlari tinglandi. Yoshlarni vatanparvarlik ruhida tarbiyalash, zamonaviy bilim va kasb-hunarlarni egallashga rag‘batlantirish masalalari yuzasidan tavsiyalar berildi. “Yoshlar – yurt tayanchi” ekani yana bir bor o‘z tasdig‘ini topdi. 

   Mazkur o‘rganish va uchrashuvlar ta’lim sohasidagi mavjud masalalarni joyida ko‘rib chiqish, ularni bosqichma-bosqich bartaraf etish hamda maktablarda sifatli ta’lim muhitini yanada mustahkamlashga xizmat qiladi.