Xalq deputatlari tuman Kengashi deputati O‘rol Cho‘tboev tashabbusi bilan tumandagi “Ko‘klam” mahallasida ko‘chalarga biriktirilgan ko‘cha boshilari ishtirokida davra suhbati tashkil etildi. Tadbir mahalla hayotini yanada obod va fayzli qilish, aholi faolligini oshirish hamda nuroniylar tajribasidan samarali foydalanishga qaratildi. 

    Davra suhbati davomida hududlarni yanada ko‘rkamlashtirish, tomorqalardan unumli foydalanish, bog‘dorchilik va dehqonchilikni rivojlantirish masalalari atroflicha muhokama qilindi. Nuroniylar o‘zlarining boy hayotiy tajribalaridan kelib chiqib, yerga mehr bilan yondashish, suv va resurslardan oqilona foydalanish, hosildorlikni
oshirish bo‘yicha qimmatli tavsiyalar berdilar. 

    Shuningdek, obodonlashtirish ishlari yuzasidan aholi bilan muntazam uchrashuvlar o‘tkazish, nuroniylardan iborat ishchi yoki maslahat guruhlarini shakllantirish, amalga oshirilgan ishlar va ularning natijalari haqida doimiy ravishda ma’lumot berib borish masalalarida kelishib olindi. 

    “Obod mahalla – farovon hayot poydevori”, deydi dono xalqimiz. Darhaqiqat, mahalladagi hamjihatlik va o‘zaro ko‘mak muhitini mustahkamlash har bir xonadonga fayz olib kiradi. Zero, “Birlik bor joyda – baraka bor”. 

    Yig‘ilishda nuroniylarning hayotiy tajribasi va amaliy maslahatlaridan keng foydalanish, yosh avlodga ibrat bo‘ladigan tashabbuslarni qo‘llab-quvvatlash zarurligi alohida ta’kidlandi. Chunki bugungi obodlik va tartib-intizom ertangi taraqqiyotning mustahkam kafolatidir. 

    Mazkur davra suhbati mahallada amalga oshirilayotgan bunyodkorlik ishlariga yangi sur’at bag‘ishlab, aholi o‘rtasida hamjihatlik va daxldorlik tuyg‘usini yanada kuchaytirdi.