Prezident murojaatnomasi muhokamasiga bag‘ishlangan davra suhbati bo‘lib o‘tdi

Xalq deputatlari Termiz tuman Kengashideputatlari tomonidan O‘zbekiston Respublikasi Prezidenti tomonidan Oliy Majlisga yo‘llangan murojaatnoma yuzasidan davra suhbati tashkil etildi.

Mazkur uchrashuvda Tuman Kengashi kotibiyati mudiri A.Avliyakulov hamda deputatlar tomonidan Yurtboshimiz tomonidan belgilab berilgan ustuvor yo‘nalishlar, ijtimoiy-iqtisodiy islohotlarning mazmun-mohiyati hamda kelgusidagi vazifalar haqida atroflicha to‘xtalib o‘tdi. Xususan, 2026-yil — “Mahallani rivojlantirish va jamiyatni yuksaltirish yili” deb e’lon qilingani, ushbu yil doirasida mahallalarning o‘rni va nufuzi yanada mustahkamlanishi, joylarda aholining muammolarini hal etishga qaratilgan aniq va manzilli choralar ko‘rilishi alohida ta’kidlandi.

Davra suhbatida mahallalarda yaratilayotgan imkoniyatlardan samarali foydalanish, hududlarni kompleks rivojlantirish, aholining turmush sharoitini yaxshilash, bandlikni ta’minlash hamda ijtimoiy infratuzilmani takomillashtirish masalalari muhokama qilindi. Shuningdek, fuqarolarni uzoq yillardan buyon qiynab kelayotgan muammolarni aniqlash, ularni tizimli hal etish hamda mazkur masalalarni 2026-yilga mo‘ljallangan Davlat dasturiga kiritish bo‘yicha takliflar ilgari surildi.

O‘z navbatida, tuman Kengashi deputatlari ham Prezident murojaatnomasi yuzasidan o‘z fikr va mulohazalarini bildirib, joylarda deputatlik nazoratini kuchaytirish, mahallalarda aholi bilan bevosita muloqotni kengaytirish, davlat organlari va jamoatchilik hamkorligini mustahkamlash zarurligini ta’kidladilar. Deputatlar tomonidan hududlarni rivojlantirish, ijtimoiy muammolarni bartaraf etish va aholi farovonligini oshirishga qaratilgan qator amaliy takliflar bildirildi.

Yakunda davra suhbati ishtirokchilari tomonidan “Mahallani rivojlantirish va jamiyatni yuksaltirish yili” doirasida belgilangan vazifalarni izchil amalga oshirish, har bir deputatning mahallalardagi muammolarni hal etishdagi mas’uliyatini oshirish hamda taklif va tashabbuslarni amaliy dasturlarga tatbiq etish bo‘yicha kelgusidagi rejalar belgilab olindi.