Tadbirda Mirobod tumani hokimi Anvar Sayfutdinov, tuman prokurori Bobur Abdullayev, SEO va JS qo‘mitasi raisining birinchi o‘rinbosari N. Atabekov, Toshkent shahar SEO va JS boshqarmasi boshlig‘i M. Qudratxo‘jayeva, hokim o‘rinbosarlari, Xalq deputatlari Mirobod tuman Kengashi deputatlar hamda
OAV vakillari ishtirok etdi. 

Tadbir avvalida so‘zga chiqqan tuman hokimi Anvar Sayfutdinov bugungi kunda aholi salomatligini
muhofaza qilish va epidemiologik osoyishtalikni ta’minlash ustuvor yo‘nalishlaridan biri ekanini ta’kidladi. 

“Mirobod tumanida har bir fuqaroning salomatligi – biz uchun eng katta qadriyat. Sanitariya-epidemiologik xizmatning moddiy-texnika bazasini mustahkamlash, laboratoriya va xizmat imkoniyatlarini zamonaviy talablarga mos ravishda yangilash bugungi kunning dolzarb vazifalaridan biridir. Binoning yangilanishi esa oddiy ta’mir emas, balki aholining xavfsizligi va sifatli tibbiy nazorat uchun qo‘yilgan yana bir muhim qadamdir. Umid qilamanki, barcha shart-sharoitlar yaratilgan ushbu
zamonaviy maskan sanepidqo‘mita xodimlarining yanada samarali va aholi manfaatiga xizmat qiluvchi faoliyatini ta’minlaydi" 

Mirobod tumani SEO va JS bo‘limi binosi 1971-yili qurilgan. 2021-yilda mahalliy byudjetdan 610 mln so‘m
ajratilib joriy ta’mirdan chiqarilgan. Shuningdek, “Fuqarolar tashabbusi” jamg‘armasi orqali yana 400 mln so‘m evaziga eshik-romlar almashtirilgan va qo‘shimcha ta’mirlash ishlari bajarilgan. 

2023- yilda “Tashabbusli byudjet” loyihasi doirasida Bakteriologiya laboratoriyasini to‘liq rekonstruksiya qilish tashabbusi g‘olib bo‘lib, ushbu maqsadga 1 mlrd so‘m mablag‘ yo‘naltirilgan.  

2025-yilda loyihaning 1-mavsumida bino fasadini to‘liq yangilash, 2-qavatni ta’mirlash, darvozani
almashtirish va hovlida sug‘orish tizimini o‘rnatish bo‘yicha tashabbus 1102 ovoz bilan g‘olib deb topildi va asosiy keng qamrovli rekonstruksiya ishlari amalga oshirildi. 

Yangilangan Mirobod tumani Sanepid bo‘limi endi zamonaviy talablarga javob beradigan, xodimlar uchun qulay ish sharoitlari yaratilgan va poytaxt aholisi salomatligiga xizmat qiluvchi muhim sanitariya-epidemiologik infratuzilma sifatida o‘z faoliyatini davom ettiradi.