Qamashi tumanida Xalq deputatlari tuman Kengashining sessiyasi o‘tkazildi. Sessiyada tuman Kengashi deputatlari, viloyat hokimi o‘rinbosari Farhod Kushakov, tuman hokimi o‘rinbosarlari, ijro organlari, jamoat tashkilotlari hamda ommaviy axborot vositalari vakillari ishtirok etdi. Sessiyani tuman hokimi Xurshid Usmonov olib bordi.

Kun tartibida Qamashi tumanining 2026-yilgi mahalliy budjetini tasdiqlash masalasi ko‘rib chiqildi. Bu borada tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Nizomiddin Mo‘minov axborot berdi.

Shuningdek, sessiyada Xalq deputatlari Qamashi tuman Kengashi raisini saylash masalasi ham muhokama qilindi.

Yangi tahrirdagi O‘zbekiston Respublikasi Konstitutsiyasining 120-moddasida Xalq deputatlari Kengashiga uning deputatlari orasidan saylangan rais boshchilik qilishi belgilangan. Shuningdek, viloyat, tuman va shahar hokimi bir vaqtning o‘zida Kengash raisi bo‘lishi mumkin emasligi qat’iy ko‘rsatib qo‘yilgan.

Konstitutsiyaning o‘tish qoidalariga muvofiq, 2024-yilda ilk marotaba Xalq deputatlari viloyatlar va Toshkent shahar Kengashlarining birinchi tashkiliy sessiyalarida deputatlar orasidan Kengash raislari saylab olingan edi. Ushbu amaliyot 2026-yil 1-yanvardan boshlab barcha tuman va shahar Kengashlariga tatbiq etilishi belgilangan.

Qonunchilikka ko‘ra, Xalq deputatlari Qamashi tuman Kengashi raisi lavozimiga nomzodlarni tavsiya etish uchun siyosiy partiyalar vakillari guruhi tashkil etildi. Tavsiya etilgan nomzodlar bo‘yicha ovoz berish natijasida, Xalq deputatlari Qamashi tuman Kengashi raisligiga tuman deputatlari orasidan 12-Oynako‘l saylov okrugi deputati Nomozov Abdumalik Ergashovich saylandi.