Xalq deputatlari Termiz tuman Kengashi deputatlari A.Avliyakulov, Sh.Norsayev, G.Shafoatova va K.Abdullayevalar “Yashil makon” umummilliy loyihasi doirasida o‘tkazilgan navbatdagi ekologik aksiyada faol qatnashib, hududlarni ko‘kalamzorlashtirish hamda atrof-muhitni asrashga o‘z hissalarini qo‘shdilar. Aksiya davomida ijtimoiy soha obyektlari, mahalla hududlari va jamoat joylarida turli manzarali hamda mevali daraxt ko‘chatlari ekildi.

Tadbir jarayonida hududni obodonlashtirish, yashil maydonlarni kengaytirish, ekologik madaniyatni yuksaltirish hamda kelajak avlod uchun sog‘lom va toza muhit yaratish masalalariga alohida e’tibor qaratildi. Deputatlar tomonidan ekilgan daraxtlar nafaqat hudud ko‘rinishini yanada chiroyli qilish, balki havoni tozalash va ekologik muvozanatni saqlashga ham xizmat qilishi ta’kidlandi.

Aksiya davomida yoshlar va mahalla faollari ham faol ishtirok etib, birgalikda obodonlashtirish ishlari amalga oshirildi. Tadbir yakunida bunday ekologik tashabbuslarni muntazam davom ettirish, daraxtlarni parvarishlash hamda yashil hududlarni kengaytirish muhim ekani qayd etildi.