Xalq deputatlari Zomin tumani Kengashining yettinchi chaqiriq o‘n oltinchi sessiyasi bo‘lib o‘tdi. Sessiya ishida viloyat hokimi o‘rinbosari B.Yusupov tuman hokimi A.Abdug’aniyev tuman hokimining o‘rinbosarlari, huquqni muhofaza qiluvchi organlar rahbarlari, kun tartibiga kiritilgan masalalarga aloqador davlat va jamoat tashkilotlari rahbarlari, ommaviy axborot vositalari vakillari, tegishli tuman tashkilotlari rahbarlari, tumanimizdan saylangan viloyat Kengashi deputatlari ishtirok etdi.

Sessiya kun tartibiga 18 ta masala kiritilib, ular deputatlar tomonidan belgilangan tartibda atroflicha muhokama qilindi.

Kun tartibida, jumladan, Zomin tumanini 2026–2027-yillarda ijtimoiy-iqtisodiy rivojlantirish dasturini tasdiqlash, hududda kriminogen vaziyatni yaxshilash, jinoyatlarning barvaqt oldini olish, korrupsiyaning oldini olish borasida amalga oshirilgan ishlar to‘g‘risidagi masalalar ko‘rib chiqildi.

Shuningdek, tuman Ichki ishlar boshqarmasi boshlig‘i o’rinbosari F.Yunusovning jinoyatchilikka qarshi kurashish, huquqbuzarliklarning oldini olish, jamoat tartibini saqlash va fuqarolar xavfsizligini ta’minlash yo‘nalishlarida amalga oshirilgan ishlari yuzasidan hisoboti tinglandi.

Sessiyada O‘zbekiston Respublikasi Prezidentining 2024 yil 31 dekabrdagi PQ–468-son — “Jizzax viloyatini ijtimoiy-iqtisodiy rivojlantirishni jadallashtirish bo‘yicha qo‘shimcha chora-tadbirlar to‘g‘risida”gi qarorining tumandagi ijrosi muhokama qilindi.

Bundan tashqari, tumandagi umumta’lim maktablarining isitish tizimlarini ta’mirlash, obodonlashtirish va ko‘kalamzorlashtirish ishlari, yo‘l yoqasidagi uy-joylarni ta’mirlash, mahallalarda videokuzatuv kameralarini o‘rnatish, tibbiyot muassasalarini moddiy-texnik jihatdan mustahkamlash, xizmat avtomashinalari va kommunal xarajatlar uchun mablag‘ ajratish masalalari yuzasidan qarorlar qabul qilindi.

Sessiyada “Ayollar daftari”ning 6-bosqichiga kiritilgan xotin-qizlar bilan bog‘liq masalalar, tumandagi geografik obyektlarni nomlash va qayta nomlash, Xalq deputatlari tuman Kengashi huzuridagi doimiy komissiyalar tarkibiga o‘zgartirishlar kiritish hamda 2026-yilga mo‘ljallangan ish rejasini tasdiqlash masalalari ham ko‘rib chiqildi.

Shuningdek, O‘zbekiston Respublikasi Prezidentining 2024 yil 5 yanvardagi PQ–5-son — “Quyi bo‘g‘inda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari to‘g‘risida”gi qarori ijrosi yuzasidan axborot tinglandi.

Sessiya yakunida kun tartibiga kiritilgan barcha masalalar yuzasidan tegishli qarorlar qabul qilinib, ularning ijrosini ta’minlash bo‘yicha mas’ul ijrochilar va aniq vazifalar belgilab olindi.