Xalıq deputatları Bozataw rayonlıq Keńesiniń deputatı Sh.Berdaxov hám Keńes sekretariatınıń bas qánigesi S.Alimov tárepinen “Ózbekstan” máhálleler awqamı Bozataw rayonlıq bóliminiń jumısı úyrenildi.
Úyreniw barısında Ózbekstan Respublikasınıń 2013-jıl 22-apreldegi "Puqaralardıń ózin-ózi basqarıw uyımları haqqında"ǵı Nızamına ózgeris hám qosımshalar kirgiziw haqqındaǵı ÓRN-350-sanlı Nızamı talapları tiykarında máhálle institutınıń jumısınıń shólkemlestiriliwi, puqaralar menen óz-ara baylanıs mexanizmleri, jergilikli áhmiyetke iye máselelerdi sheshiwdegi wákillikleri hám xalıqtıń máplerin qorǵawdaǵı roli tallandı.
Sonday-aq, puqaralardıń ózin-ózi basqarıw xızmetinde nızamlılıq, ashıq-aydınlıq, demokratiyalıq principler, sociallıq ádillik, óz-ara járdem hám sociallıq sheriklik qaǵıydalarınıń ámelge asırılıwına ayrıqsha itibar qaratıldı.
Úyreniw dawamında máhálle menen xalıq arasında tıǵız baylanıs ornatıw, puqaralardıń múrájatların óz waqtında kórip shıǵıw, jergilikli máselelerdi anıqlaw hám olardı sheshiw boyınsha alıp barılıp atırǵan jumıslardıń nátiyjeliligi de kórip shıǵıldı.
Máhálle - xalıqqa eń jaqın buwın. Sonlıqtan onıń xızmetiniń nızam talapları tiykarında durıs shólkemlestiriliwi xalıqtıń kúndelikli máselelerin sheshiwde áhmietli orın tutadı.