O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosini ta’minlash maqsadida 15-Zuhro saylov okrugi hududidagi ijtimoiy soha obyektlarida o‘rganishlar davom ettirilmoqda.

Navbatdagi o‘rganish Xalq deputatlari Marg‘ilon shahar Kengashi deputati, kotibiyat mudiri A. Ermatov, deputatga biriktirilgan kotibiyat bosh mutaxassisi Z. Yakubova hamda shahar maktabgacha va maktab ta’limi bo‘limi mutaxassisi M. Sheraliyev hamrohligida 26-sonli maktabgacha ta’lim tashkilotida o‘tkazildi.

O‘rganish davomida muassasaning faoliyati, tarbiyalanuvchilar uchun yaratilgan sharoitlar, moddiy-texnik holati hamda kuz-qish mavsumiga tayyorgarlik jarayonlari ko‘zdan kechirildi.

Muassasa mudirasi N. Radjiyeva ma’lumotiga ko‘ra, 360 o‘ringa mo‘ljallangan maktabgacha ta’lim tashkilotida 60 nafar xodim faoliyat olib bormoqda. Tashkilotda tarbiyalanuvchilar uchun zarur sharoitlarni yaratishga e’tibor qaratilgan.

Mazkur muassasa 2021-yilda mukammal ta’mirdan chiqarilgan. Shu bilan birga, o‘rganish jarayonida mavjud ayrim muammolar ham aniqlanib, ularni bartaraf etish zarurligi qayd etildi.

Xususan, qish mavsumida muassasani barqaror issiqlik bilan ta’minlash masalasida 2 ta qozonning nosozligi aniqlandi. Shuningdek, oshxonaga kirish qismidagi foye tom qismini yangilash zarurati mavjud. Ushbu qismda yomg‘ir suvlari o‘tishi kuzatilayotgani sababli tom qoplamasini ta’mirlash masalasiga e’tibor qaratish lozim.

Aniqlangan kamchiliklarni bartaraf etish, avvalo, tarbiyalanuvchilar uchun xavfsiz va qulay sharoitlarni ta’minlash, shuningdek, kuz-qish mavsumini muammosiz o‘tkazish nuqtayi nazaridan muhimdir.

O‘rganish davomida aniqlangan masalalar qayd etilib, ularni bartaraf etish bo‘yicha mas’ullarga tegishli tavsiyalar berildi. Mazkur masalalarning ijrosi deputatlik nazorati doirasida kuzatib boriladi.