Termiz shahrida ijtimoiy himoyaga muhtoj oilalarni qo‘llab-quvvatlash, xalqimizning og‘irini yengil qilish hamda mahallalarda ijtimoiy xizmatlar ko‘rsatish tizimini yangi qonunchilik mezonlari asosida takomillashtirish borasidagi deputatlik nazorati izchil davom ettirilmoqda.

Xalq deputatlari Termiz shahar Kengashining 11-“Do‘stlik” saylov okrugi deputati S.Xodjayeva hamda Kengash kotibiyati bosh mutaxassisi A.Temirov “Do‘stlik” mahallasida bo‘lib, mahalla ijtimoiy xodimining bugungi kundagi faoliyati yuzasidan nazorat-tahlil va muloqot tadbirini o‘tkazdilar.

Mazkur jarayon mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari doirasida tashkil etilib, O‘zbekiston Respublikasining 2026-yil 23-iyuldagi O‘RQ–1159-sonli “Ijtimoiy ish to‘g‘risida”gi Qonuni talablarining mahalla darajasidagi ijrosi yuzasidan fikr almashildi.

Nazorat-tahlil davomida mahalladagi ijtimoiy himoyaga muhtoj fuqarolar va oilalar bilan olib borilayotgan ishlar, ularning ehtiyojlarini o‘rganish, mavjud muammolarni aniqlash hamda ijtimoiy xizmatlarni manzilli tashkil etish masalalariga alohida e’tibor qaratildi.

Bugungi kunda “Do‘stlik” mahallasida 118 ta oila reyestrda mavjud bo‘lib, shundan 5 tasi kambag‘allik chegarasidagi oilalarni tashkil etadi. Shuningdek, 40 ta davlat ta’minotidagi oila mavjud. Mazkur oilalarning ijtimoiy holatini yaxshilash, muammolarini bosqichma-bosqich hal etish va zarur ko‘mak bilan ta’minlash bo‘yicha ijtimoiy xodim tomonidan tizimli ishlar amalga oshirilmoqda.

Jumladan, oilalarning ehtiyojlari o‘rganilib, ularga tegishli ijtimoiy xizmat va yordamlarni ko‘rsatish, mavjud imkoniyatlardan samarali foydalanish hamda muammolarni tegishli tashkilotlar bilan hamkorlikda hal etishga qaratilgan amaliy choralar ko‘rilmoqda.

Shuningdek, ijtimoiy xizmatlardan foydalanayotgan fuqarolar bilan ishlash samaradorligi, murojaatlarning o‘z vaqtida ko‘rib chiqilishi hamda aholining ijtimoiy himoyaga oid huquq va manfaatlarini ta’minlash holati tahlil qilindi.

Nazorat-tahlil yakunlari bo‘yicha ijtimoiy xodim faoliyatini yanada takomillashtirish, ijtimoiy himoyaga muhtoj oilalar bilan individual va manzilli ishlashni kuchaytirish hamda mavjud muammolarni o‘z vaqtida bartaraf etish yuzasidan tegishli tavsiyalar berildi.