Chilonzor tumanidagi Buchon universiteti binosida Chilonzor tumani hokimi Xolxo‘jayev Saidqahhor Muhammadkarimovichning tuman aholisiga murojaatnomasini yo‘llash tadbiri bo‘lib o‘tdi.

Tadbirda xalq deputatlari Chilonzor tumani Kengashi deputatlari Mahmudova Donoxon Artikovna, Mutalov Omonulla Nigmatullayevich, Ahmedov Shuxrat Murotovich hamda Madamin Nazirovlar ishtirok etdi.

Murojaatda davlatimiz rahbari tomonidan hududlar oldiga qo‘yilayotgan ustuvor vazifalardan kelib chiqib, Chilonzor tumanini yanada obod va farovon hududga aylantirish, aholi daromadlarini oshirish, kambag‘allik va ishsizlikni qisqartirish, tadbirkorlikni rivojlantirish hamda yangi ish o‘rinlari yaratish bo‘yicha aniq maqsad va rejalar belgilab berildi.

Tuman hokimi murojaatida barcha sohalarda mahallalar va ko‘chalar kesimida amalga oshiriladigan ishlar, infratuzilmani yaxshilash, obodonlashtirish, investitsiyalarni jalb qilish, tadbirkorlarga yaratiladigan imkoniyatlar, ta’lim va ijtimoiy sohadagi vazifalarga alohida to‘xtaldi.

Shuningdek, har bir loyiha bo‘yicha aniq muddat, mas’ul va natija ochiq belgilanishi ta’kidlandi hamda “Va’da emas, balki aniq ro‘yxat, aniq sanalar va raqamlarga asoslangan rejalarimizni sizlarning e’tiboringizga havola qilmoqdaman”, — dedi Saidqahhor Xolxo'jayev.

Murojaat davomida Chilonzorni kambag‘allik va ishsizlikdan holi, zamonaviy, obod va tadbirkorlik uchun qulay hududga aylantirish bo‘yicha amalga oshiriladigan vazifalar ochiq bayon qilindi.