Xalq deputatlari Qo‘qon shahar Kengashi kotibiyat mudiri A.Nosirov tomonidan o‘zi deputat etib saylangan “Isfara guzari” saylov okrugi hududidagi “Isfara guzari” MFYda mahalla faollari bilan uchrashuv o‘tkazildi.

Uchrashuvda mahalla raisi S.Mirzayev, hokim yordamchisi D.Sherquziyev hamda mahalla faollari ishtirok etib, hududda mavjud muammolar, aholini qiynayotgan masalalar va ularni bartaraf etish bo‘yicha amalga oshirilayotgan ishlar yuzasidan fikr almashildi.

Suhbat davomida mahalla hududidagi Parkent, Bog‘ibo‘ston va U.Umarxon ko‘chalarida yo‘l qoplamasining ayrim qismlarida chuqurlar paydo bo‘lgani hamda ularni ta’mirlash, ya’ni chuqurlarni yamash masalasi ko‘tarildi.

Mazkur muammo mahalla faollari tomonidan deputat e’tiboriga yetkazilib, aholiga qulay va xavfsiz harakatlanish sharoitlarini yaratish maqsadida yo‘llardagi mavjud chuqurlarni bartaraf etish zarurligi ta’kidlandi.

A.Nosirov tomonidan ko‘tarilgan masala yuzasidan tegishli mas’ullar bilan hamkorlikda muammoni o‘rganish va amaliy yechim topish bo‘yicha zarur choralarni ko‘rish belgilandi.

Shuningdek, hududdagi infratuzilma bilan bog‘liq boshqa muammolarni ham manzilli o‘rganish, ularni tegishli tashkilotlar bilan hamkorlikda bosqichma-bosqich hal etish muhimligi qayd etildi.

Xalq deputatlari Qo‘qon shahar Kengashi