ТИББИЙ ХИЗМАТ СИФАТИНИ ЯХШИЛАШ БЎЙИЧА ДЕПУТАТ СЎРОВИ ЮБОРИЛДИ
Халқ депутатлари Янгиқўрғон тумани Кенгашининг 11-Туман сайлов округи депутати Рустамжон Миразимов томонидан аҳолига тиббий хизмат кўрсатиш ҳолати ўрганилди.
Ўрганиш жараёнида 57-сонли оилавий шифокорлик пунктининг Туман маҳалласида жойлашган филиалида ходимлар фойдаланиши учун атиги битта компьютер жамланмаси мавжудлиги аниқланди. Филиал ходимлари ушбу техникадан навбатма-навбат фойдаланиб келаётгани тиббий хизматларни электрон шаклда тезкор ва сифатли кўрсатишда муайян қийинчиликларни юзага келтирмоқда.
Мазкур филиал Туман ва Деҳқонобод маҳаллаларида истиқомат қилувчи аҳолига хизмат кўрсатишини ҳисобга олиб, унинг техник имкониятларини кенгайтириш муҳим экани таъкидланди.

Шу муносабат билан, Янгиқўрғон туман тиббиёт бирлашмасига депутат сўрови юборилиб, 57-сонли оилавий шифокорлик пункти филиалини қўшимча битта замонавий компьютер жамланмаси билан таъминлаш масаласини кўриб чиқиш сўралди.
Депутат сўровининг кўриб чиқилиши ва натижаси назоратга олинди.