Xalıq deputatları Bozataw rayonı Keńesi sekretariatı baslıǵı A. Ibragimov hám “Qusqanataw” APJ baslıǵı J. Nurmanov tárepinen PQ-49-sanlı qarar tiykarında Bozataw rayonı aymaǵınan ótiwshi 95B123-sanlı “Bozataw–Shaxaman” avtomobil jolında kesip ótiwshi “Sadlıq” jabınıń kópirin ońlaw jumısları menen tanısıw boyınsha úyreniw jumısları alıp barıldı.
Úyreniw barısında usı kópirde alıp barılıp atırǵan ońlaw jumıslarınıń házirgi jaǵdayı, jumıslardıń belgilengen joba hám talaplar tiykarında shólkemlestiriliwi, sonıń menen birge, kópir konstruksiyalarınıń bekkemligi hám qáwipsizligi máselelerine ayrıqsha itibar berildi.
Sonday-aq, avtomobil jolınan kúndelikli paydalanıp atırǵan aydawshılar hám piyadalar ushın qolaylı hám qáwipsiz qatnawdı támiyinlew, kópirden paydalanıw barısında júz beriwi múmkin bolǵan qáwiplerdiń aldın alıw boyınsha kórilip atırǵan ilajlar da úyrenildi.
Kópirdegi ońlaw jumıslarınıń sapalı hám óz waqtında tamamlanıwı, jol qatnawınıń qáwipsizligin támiyinlew hám aymaqtaǵı transport infrastrukturasın jaqsılawda áhmiyetli ekenligi atap ótilip, jumıslardı sapalı alıp barıw boyınsha tiyisli pikir hám usınıslar bildirildi.
Bunday úyreniw jumısları rayon aymaǵındaǵı avtomobil jolları hám kópirlerdiń jaǵdayın baqlaw, aniqlanǵan máselelerdi tiyisli tártipte kóteriw hám olardıń sheshimin támiyinlewge baǵdarlanǵan.