Xalq deputatlari Qo‘qon shahar Kengashining navbatdagi 27-sessiyasiga tayyorgarlik ko‘rish masalalari yuzasidan Kengash raisi O‘.Tojiyeva hamda Kengash kotibiyati mudiri A.Nosirov ishtirokida muhokama o‘tkazildi.

Muhokama davomida navbatdagi sessiya kun tartibiga kiritilishi rejalashtirilayotgan masalalar, ular yuzasidan taqdim etilgan axborot va hisobotlar hamda doimiy komissiyalarda olib borilgan muhokamalar natijalari atroflicha ko‘rib chiqildi.

Jumladan, sessiya kun tartibiga quyidagi masalalarni kiritish rejalashtirilmoqda:

O‘zbekiston Respublikasi Prezidentining 2025-yil 25-noyabrdagi “Kambag‘allikdan farovonlik sari” dasturini amalga oshirishga faol nuroniylarni jalb etish chora-tadbirlari to‘g‘risidagi PQ-405-son qarori ijrosi yuzasidan “Nuroniy” jamg‘armasi Qo‘qon shahar bo‘limining axboroti;

Qo‘qon shahar soliq inspeksiyasi tomonidan 2026-yilning 2-choragi davomida amalga oshirilgan ishlar to‘g‘risidagi hisobot;

Shahar adliya bo‘limining 2026-yilning 6 oyi davomida shahardagi davlat organlari va tashkilotlarining norma ijodkorligi hamda huquqni qo‘llash amaliyoti holati yuzasidan axboroti;

O‘zbekiston Respublikasi Prezidentining 2026-yil 5-fevraldagi “2026-yilda hududlarni yangicha yondashuvlar asosida rivojlantirish orqali aholi daromadini oshirish, barqaror ish o‘rinlarini yaratish hamda kambag‘allikni qisqartirish chora-tadbirlari to‘g‘risida”gi PQ-49-son qarori ijrosini ta’minlash yuzasidan Xalq deputatlari Qo‘qon shahar Kengashining 2026-yil 28-martdagi VII-19-28-11-166-K/26-son qarorining 1-ilovasiga o‘zgartirish kiritish masalasi;

“Infratuzilma va ijtimoiy barqarorlik jamg‘armasi”dan mablag‘ ajratish to‘g‘risidagi masala.

Muhokama jarayonida mazkur masalalar yuzasidan mas’ul tashkilotlar tomonidan taqdim etilgan axborot va hisobotlar ko‘rib chiqildi. Shuningdek, ular Kengashning tegishli doimiy komissiyalarida muhokama qilinib, o‘tkazilgan o‘rganishlar davomida fuqarolardan kelib tushgan taklif va mulohazalar ham inobatga olindi.

Muhokama yakunida navbatdagi 27-sessiyani puxta tayyorlash, kun tartibidagi masalalarni har tomonlama o‘rganish hamda sessiyada ko‘rib chiqiladigan qaror loyihalarini belgilangan tartibda tayyorlash bo‘yicha tegishli vazifalar belgilab olindi.

Xalq deputatlari Qo‘qon shahar Kengashi