🌿 Quduqsoy mahallasida obodonlashtirish va bunyodkorlik ishlari o‘rganildi

Xalq deputatlari Bandixon tuman Kengashi deputati G. Xolmatova "Quduqsoy" mahallasida bo‘lib, Prezidentimiz tomonidan belgilangan ustuvor vazifalar hamda "Mahallada obodlik va mehr-saxovat oyligi" doirasida amalga oshirilayotgan bunyodkorlik, obodonlashtirish va ko‘kalamzorlashtirish ishlari bilan tanishdi.

Tashrif davomida mahalladagi ko‘chalar va ichki yo‘llarni tartibga keltirish, ariq-zovurlarni tozalash, infratuzilma obyektlarini obodonlashtirish, sanitariya holatini yaxshilash hamda ko‘kalamzorlashtirish ishlari o‘rganildi. Shuningdek, yangi daraxt va gul ko‘chatlarini ekish, yashil hududlarni kengaytirish va ularni parvarishlash ishlari ko‘zdan kechirildi.

Shuningdek, aholi yashash hududlarida ozodalikni ta'minlash, chiqindilarni o‘z vaqtida olib chiqish va jamoat joylarini yanada obod holga keltirish bo‘yicha amalga oshirilayotgan ishlar tahlil qilindi.

Tashrif yakunida bunyodkorlik va obodonlashtirish ishlarini sifatli hamda belgilangan muddatlarda yakunlash, aniqlangan kamchiliklarni bartaraf etish yuzasidan mas'ullarga tegishli tavsiya va ko‘rsatmalar berildi.

Bugungi kunda "Mahallada obodlik va mehr-saxovat oyligi" doirasida Bandixon tumanining barcha mahallalarida obodonlashtirish, ko‘kalamzorlashtirish va bunyodkorlik ishlari izchil davom ettirilmoqda. Bu sa'y-harakatlar mahallalar qiyofasini yanada obod va fayzli qilish, ekologik tozalikni mustahkamlash hamda aholi uchun qulay yashash muhitini yaratishga xizmat qilmoqda.