Xalq deputatlari Chilonzor tumani Kengashi deputati Imamov Sanjarali To‘lqinovich fuqarolar murojaatlarida ko‘tarilayotgan masalalarni joyida o‘rganish hamda hudud infratuzilmasini yanada yaxshilash maqsadida tuman elektr tarmoqlari korxonasi mutaxassislari va mahalla faollari bilan birgalikda Tirsakobod mahalla fuqarolar yig‘ini hududida elektr ta'minoti tizimining texnik holatini o‘rgandi.

Joyiga chiqqan holda olib borilgan o‘rganishlar natijasida mahalla hududida joylashgan 3621-sonli transformator punktining texnik holati mavjud yuklama va foydalanish talablari darajasiga to‘liq javob bermasligi aniqlandi. Shuningdek, mazkur transformator orqali elektr energiyasi bilan ta'minlanayotgan xonadonlarda elektr uzilishlari muntazam kuzatilayotgani, bu esa aholi uchun qator noqulayliklarni keltirib chiqarib, fuqarolarning haqli e'tiroz va murojaatlariga sabab bo‘layotgani qayd etildi.

Aniqlangan kamchiliklarni tezkor bartaraf etish hamda elektr ta'minoti tizimining ishonchliligi va barqarorligini oshirish maqsadida deputat tashabbusi bilan tuman elektr tarmoqlari mutaxassislari tomonidan zarur texnik va tashkiliy choralar ko‘rildi.

Jumladan, 3621-sonli transformatorga qo‘shimcha avtomatik uzatma qurilmasi o‘rnatilib, yangi elektr kabeli tortildi. Mazkur amaliy ishlar elektr tarmog‘idagi yuklamani me'yorlashtirish, avariyaviy holatlar va elektr uzilishlari ehtimolini kamaytirish, eng muhimi esa hudud aholisini sifatli, barqaror va uzluksiz elektr energiyasi bilan ta'minlashga xizmat qiladi.

Deputat tomonidan hududlarda mavjud infratuzilmaviy muammolarni aniqlash, ularni mutasaddi tashkilotlar bilan hamkorlikda hal etish hamda amalga oshirilayotgan ishlar ijrosini doimiy deputatlik nazoratida olib borish bo‘yicha tizimli ishlar davom ettirilmoqda.