Navbatdagi sayyor qabul uchrashuvi o‘tkazildi

Xalq deputatlari Navoiy shahar Kengashi raisi Baxtiyor Bazarov tomonidan 21-Turon saylov okrugida joylashgan "Yoshlik" mahalla fuqarolar yig‘ini aholisi va saylovchilari bilan navbatdagi sayyor qabul o‘tkazildi.

Qabulda Xalq deputatlari Navoiy shahar Kengashi Kotibiyati mudiri Jo‘rabek Hafizov, Kotibiyat bosh mutaxassisi Diyorbek Toyirov hamda O‘zbekiston Xalq demokratik partiyasi Navoiy shahar Kengashi raisi Jo‘rabek Hamroyev ishtirok etdi.

Sayyor qabul davomida fuqarolar tomonidan turar joylarga oid kadastr hujjatlarini rasmiylashtirish, mahalla hududidagi ichki yo‘llarni ta’mirlash, aholi xonadonlarini oqova suv tarmog‘i bilan ta’minlash, ichimlik suvi sifatini yaxshilash, aholi bandligini ta’minlash, subsidiyalar ajratilishi hamda fuqarolar salomatligini yaxshilash bilan bog‘liq masalalar yuzasidan murojaatlar bildirildi.

Qabul davomida har bir murojaat atroflicha ko‘rib chiqilib, ularning mazmuni yuzasidan tegishli huquqiy tushuntirishlar berildi. Shuningdek, ko‘tarilgan masalalarning qonuniy va o‘z vaqtida hal etilishini ta’minlash maqsadida mas’ul korxona va tashkilotlarga belgilangan tartibda deputatlik so‘rovlari yuborilishi ma’lum qilindi.

Bunday sayyor qabullar aholi bilan ochiq muloqotni ta’minlash, fuqarolarni qiynayotgan muammolarni joyida o‘rganish hamda ularning yechimi yuzasidan amaliy choralar ko‘rishda muhim ahamiyat kasb etmoqda.