ҚОРАПОЛВОН МАҲАЛЛАСИДА ОБОДОНЛАШТИРИШ ИШЛАРИ ЖАДАЛ ДАВОМ ЭТМОҚДА
Бугун эрта тонгдан Қораполвон маҳалласида «Маҳаллада ободлик ва меҳр-саховат» ойлиги доирасида кенг кўламли ободонлаштириш ва бунёдкорлик ишлари ташкил этилди.
Жумладан, «Янги Ўзбекистон қиёфасидаги маҳалла» дастури асосида Маданият маркази атрофи ободонлаштирилмоқда. Шунингдек, аҳоли, айниқса, ёшлар учун замонавий ва қулай шарт-шароитлар яратиш мақсадида «Workout» спорт майдончаси ҳамда маҳалла «еттилиги» фаолият юритиши учун янги бино қуриш ишлари олиб борилмоқда.
Амалга оширилаётган ишларни туман ҳокими, Халқ депутатлари Янгиқўрғон тумани Кенгаши депутати Асадулла Нажмиддинов жойига чиққан ҳолда кўздан кечирди.
Ўрганиш жараёнида бунёдкорлик ва ободонлаштириш ишларининг сифати ва белгиланган муддатларда бажарилишига алоҳида эътибор қаратилди. Ҳудудни янада кўкаламзорлаштириш, тозаликни таъминлаш ва тартибга келтириш бўйича масъулларга тегишли топшириқ ҳамда тавсиялар берилди.
Таъкидланганидек, маҳаллаларда амалга оширилаётган бундай эзгу ишлар аҳоли учун янада қулай, хавфсиз ва обод яшаш муҳитини яратишга хизмат қилади.