Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat A.Kulbayev tumanning “Dumaloq” mahallasiga biriktirilgan xotin-qizlar faoli N.Axinovaning ish faoliyatini o‘rganib, xotin-qizlarni ijtimoiy qo‘llab-quvvatlash, ularning bandligini ta’minlash, oilalar mustahkamligini saqlash hamda huquqiy ongini oshirish borasida amalga oshirilayotgan ishlar bilan tanishdi.

O‘rganish davomida ma’lum bo‘lishicha, joriy oy mobaynida xotin-qizlar faoli tomonidan muammoli oilalar bilan manzilli ishlash natijasida 3 ta oila yarashtirilib, ajrimning oldi olingan. Shuningdek, mahallada o‘tgan 6 oy davomida birorta ham ajrim holati qayd etilmagani amalga oshirilayotgan profilaktik ishlar samaradorligini ko‘rsatadi.

Shu bilan birga, mahallaning “Ayollar daftari”ga jami 65 nafar xotin-qiz kiritilgan bo‘lib, ularning ehtiyoj va muammolari toifalar kesimida tizimli ravishda o‘rganilmoqda. Bandlikni ta’minlash yo‘nalishida amalga oshirilgan ishlar natijasida 1-toifadagi xotin-qizlarning 3 nafari rasmiy ishga joylashtirilgan, 18 nafari esa norasmiy mehnat faoliyatini davom ettirmoqda. Shuningdek, 2-toifadagi 4 nafar xotin-qiz imtiyozli kreditlardan foydalanib, o‘z tadbirkorlik faoliyatini yo‘lga qo‘ygan.

Sog‘liqni saqlash sohasida 4-toifadagi 15 nafar xotin-qiz tibbiy ko‘rikdan o‘tkazilgan bo‘lib, ular doimiy ravishda turli ma’naviy-ma’rifiy va ijtimoiy tadbirlarga jalb etib kelinmoqda. 5-toifaga kiritilgan 20 nafar xotin-qiz bilan huquqiy savodxonlikni oshirish maqsadida tuman Ichki ishlar boshqarmasi hamda Adliya bo‘limi mas’ul xodimlari ishtirokida huquqiy maslahat va tushuntirish suhbatlari tashkil etilgan.

O‘rganish yakunida deputat tomonidan xotin-qizlar bilan manzilli ishlash, ularning bandligini yanada oshirish, ijtimoiy muhofazaga muhtoj oilalarni qo‘llab-quvvatlash hamda oilalar mustahkamligini ta’minlash borasidagi ishlarni izchil davom ettirish yuzasidan tegishli taklif va tavsiyalar berildi.