Xalq deputatlari Termiz shahar Kengashi kotibiyati mudiri A.Ashurov hamda kotibiyat bosh mutaxassisi A.Temirovlar “Madad” nodavlat notijorat tashkilotining (NNT) Termiz shahar huquqiy maslahat byurosiga tashrif buyurib, tashkilotning bugungi kunda aholiga ko‘rsatayotgan huquqiy maslahatlar va amalga oshirilayotgan loyihalari bilan yaqindan tanishdilar.
O‘rganishlar davomida deputatlar hamda “Madad” NNT mutaxassislari o‘rtasida aholini qiynayotgan ijtimoiy-huquqiy muammolarga yechim topishda birgalikda ishlash masalalari muhokama qilindi.
Shuningdek, O‘zbekiston nodavlat notijorat tashkilotlari milliy assotsiatsiyasi (O‘zNNTMA)ning Surxondaryo viloyati hududiy bo‘linmasi rahbariyati bilan ham uchrashuv tashkil etildi. Uchrashuv yakunida:
• Shahardagi dolzarb ijtimoiy muammolarni hal etishda Kengash va NNTlar o‘rtasidagi hamkorlikni yangi bosqichga olib chiqish;
• Mahallalarda aholining huquqiy madaniyatini yuksaltirishga qaratilgan qo‘shma "yo‘l xaritalari"ni ishlab chiqish;
• Deputatlik so‘rovlari va NNTlarning tahliliy xulosalari asosida fuqarolar huquqlarini himoya qilish tizimini kuchaytirish bo‘yicha o‘zaro hamkorlik to‘g‘risida kelishuvga erishildi.
"Bugungi kunda 'Madad' NNT kabi tashkilotlarimiz xalqimizga bepul huquqiy ko‘mak berishda eng yaqin yordamchimizga aylandi. O‘zNNTMA viloyat bo‘linmasi bilan o‘rnatilayotgan ushbu hamkorlik shahrimizdagi fuqarolarning huquqiy himoyasini kuchaytirish hamda ijtimoiy muammolarni qonuniy asosda, tezkor hal etishimizga xizmat qiladi," — deya ta'kidladi kotibiyat mudiri.
Kengash va NNTlar o‘rtasidagi bu kabi hamkorlik aholining davlat organlariga bo‘lgan ishonchini oshirish va jamiyatda qonuniylikni mustahkamlashga qaratilgan muhim qadamdir.