Xalq deputatlari Qo‘qon shahar Kengashining "Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha" doimiy komissiyasi a’zolari tomonidan Xalq deputatlari Qo‘qon shahar Kengashining 2026-yil 24-apreldagi VII-20-34-11-166-K/26-sonli qarori ijrosi yuzasidan 27-sonli umumta’lim maktabida robototexnika muhandislik xonasini tashkil etish ishlarining holati o‘rganildi.

O‘rganish davomida robototexnika xonasini tashkil etish bo‘yicha amalga oshirilayotgan qurilish-ta’mirlash ishlari, xonaning zamonaviy ta’lim talablariga mos ravishda jihozlanishi, zarur texnik vositalar va o‘quv uskunalari bilan ta’minlanish darajasi atroflicha ko‘zdan kechirildi.

Shuningdek, o‘quvchilarning zamonaviy axborot texnologiyalari, muhandislik va robototexnika yo‘nalishlari bo‘yicha bilim va amaliy ko‘nikmalarini oshirish uchun yaratilayotgan shart-sharoitlar, loyiha ijrosining belgilangan muddatlarda amalga oshirilishi hamda ajratilgan mablag‘lardan maqsadli foydalanish masalalari muhokama qilindi.

O‘rganish jarayonida aniqlangan holatlar yuzasidan mas’ullar bilan fikr almashilib, robototexnika muhandislik xonasini qisqa muddatlarda foydalanishga topshirish, jihozlash ishlarini jadallashtirish hamda o‘quvchilar uchun zamonaviy va qulay ta’lim muhitini yaratish bo‘yicha tegishli tavsiya va takliflar bildirildi.

Xalq deputatlari Qo‘qon shahar Kengashi