Navoiy shahar Oila va xotin-qizlar bo‘limi faoliyati deputatlar tomonidan o‘rganildi

Xalq deputatlari Navoiy shahar Kengashining nazorat funksiyalaridan kelib chiqib, Kengash deputatlari N. Irgasheva, N. Xudaykulova, Sh. Tasheva hamda Xalq deputatlari Navoiy shahar Kengashi kotibiyatining bosh mutaxassisi M. Astanov ishtirokida Navoiy shahar Oila va xotin-qizlar bo‘limining 2026-yil I yarim yillik faoliyati yuzasidan o‘rganish o‘tkazildi.

O‘rganish davomida bo‘lim tomonidan xotin-qizlarni ijtimoiy qo‘llab-quvvatlash, ularning muammolarini aniqlash va bartaraf etish, "Ayollar daftari"ni yuritish, ehtiyojmand xotin-qizlarga ko‘rsatilayotgan ijtimoiy va tibbiy xizmatlar, shuningdek, homilador ayollarni prenatal skrining tekshiruvlari bilan qamrab olish borasida amalga oshirilgan ishlar atroflicha tahlil qilindi.

Jumladan, "Ayollar daftari"ga kiritilgan xotin-qizlar bilan ishlash tizimi, ularning ijtimoiy-iqtisodiy muammolarini o‘rganish, individual dasturlar ishlab chiqish, ehtiyojmand xotin-qizlarni qo‘llab-quvvatlash hamda davlat tomonidan belgilangan dasturlar ijrosi yuzasidan olib borilgan ishlar o‘rganildi.

O‘rganish natijalari bo‘yicha bo‘lim faoliyatiga huquqiy baho berilib, amaldagi qonunchilik hujjatlari ijrosini ta’minlash, xotin-qizlarni har tomonlama qo‘llab-quvvatlash, ularga ko‘rsatilayotgan xizmatlar sifatini yanada oshirish hamda mavjud ishlar samaradorligini kuchaytirish yuzasidan tegishli tavsiya va takliflar ishlab chiqildi.

Mazkur o‘rganish Xalq deputatlari Navoiy shahar Kengashining nazorat faoliyati doirasida amalga oshirilib, davlat organlari faoliyatining ochiqligi va samaradorligini ta’minlash, shuningdek, xotin-qizlarning huquq va qonuniy manfaatlarini himoya qilishga qaratilgan ishlarni yanada takomillashtirishga xizmat qiladi.