Xalq deputatlari Uchquduq tuman Kengashining navbatdagi sessiyasi kun tartibiga kiritilgan “Jinoyatchilikka qarshi kurashish hamda huquqbuzarlik profilaktikasi sohasida 2026-yilning o‘tgan 6 oyi davomida amalga oshirilgan ishlar to‘g‘risida”gi masalani atroflicha ko‘rib chiqish maqsadida joylarda o‘rganish ishlari tashkil etildi.

Mazkur o‘rganishlarda Xalq deputatlari Uchquduq tuman Kengashining 15-“Istiqlol” saylov okrugi deputati U.Xudoyqulov, 10-“Mustaqillik” saylov okrugi deputati E.Normurodov, 14-Navoiy saylov okrugi deputati M.Ravshanova hamda Kengash kotibiyati bosh mutaxassisi
M.Muhammadiyev ishtirok etdilar.

Ishchi guruh tomonidan “Do‘stlik”, “Aytim” va “Navoiy” mahalla fuqarolar yig‘inlarida huquqbuzarliklar profilaktikasi hamda jinoyatchilikka qarshi kurashish yo‘nalishida amalga oshirilayotgan ishlar o‘rganildi.

Jumladan, mahallalarda kriminogen vaziyat, profilaktik tadbirlarning samaradorligi, ijtimoiy profilaktika, yoshlar va xotin-qizlar bilan ishlash, huquqbuzarliklarning oldini olish yuzasidan ko‘rilayotgan choralar hamda mavjud muammo va kamchiliklar tahlil qilindi.

Shuningdek, mahalla faollari va mas'ul tashkilotlar vakillari bilan muloqotlar o‘tkazilib, fuqarolar xavfsizligini ta'minlash, huquqbuzarliklarning barvaqt oldini olish hamda bu boradagi hamkorlikni yanada kuchaytirish yuzasidan fikr va takliflar tinglandi.

O‘rganishlar davomida aniqlangan holatlar umumlashtirilib, ularni bartaraf etish bo‘yicha tegishli tavsiya va takliflar ishlab chiqiladi hamda navbatdagi sessiyada mazkur masala yuzasidan muhokama qilinib, tegishli qarorlar qabul qilinishi rejalashtirilgan.