Тиббиёт муассасаларидаги таъмирлаш ишлари депутатлик назоратида
Халқ депутатлари Янгиқўрғон тумани Кенгаши депутати, туман ҳокими Асадулла Нажмиддинов туман тиббиёт бирлашмасида бўлиб, олиб борилаётган реконструкция ва капитал таъмирлаш ишларининг боришини ўрганди.
Туманда аҳолига кўрсатилаётган тиббий хизмат сифатини яхшилаш, тиббиёт муассасаларининг моддий-техник базасини мустаҳкамлаш ҳамда беморлар ва тиббиёт ходимлари учун қулай шароитлар яратиш мақсадида амалий ишлар олиб борилмоқда.
Хусусан, инвестиция дастуридан иқтисод қилинган маблағлар ҳисобидан умумий қиймати 12 миллиард сўмлик реконструкция ва капитал таъмирлаш ишлари амалга оширилмоқда. Лойиҳа доирасида тиббиёт бирлашмасидаги 7 та асосий бинонинг фасад қисмлари таъмирланмоқда. Шунингдек, поликлиника ва туғруқхона биноларида капитал таъмирлаш ишлари олиб борилмоқда.
Депутатлик назорати доирасида қурилиш-таъмирлаш ишларининг бориши, уларни сифатли ташкил этиш ҳамда биноларни замонавий талабларга мувофиқ таъмирлаш ҳолатига эътибор қаратилди.
Мазкур ишлар аҳоли учун қулай шароитларни кенгайтириш ва тиббий хизмат кўрсатиш имкониятларини яхшилашга хизмат қилади.