MAHALLADAGI MAS’ULLAR FAOLIYATI O‘RGANILDI

Xalq deputatlari Qo‘shko‘pir tuman Kengashi deputati M. Artiqova Uyg‘ur mahallasida bo‘lib, mahalladagi “yettilik” tizimi doirasida faoliyat yuritayotgan mas’ullarning ish faoliyati bilan yaqindan tanishdi.
O‘rganish davomida mahalla yoshlar yetakchisi G. Sotiboldiyeva hamda ijtimoiy xodim D. Shomurotovaning o‘zlariga biriktirilgan yo‘nalishlar bo‘yicha amalga oshirayotgan ishlari, aholi, xususan, yoshlar va ijtimoiy ko‘makka muhtoj fuqarolar bilan olib borayotgan faoliyati ko‘zdan kechirildi.
Shuningdek, yoshlar bilan ishlash, ularning bandligini ta’minlash, bo‘sh vaqtini mazmunli tashkil etish, ijtimoiy himoyaga muhtoj oilalarni aniqlash va ularga manzilli ko‘mak ko‘rsatish borasidagi ishlar yuzasidan fikr almashildi.
Deputat tomonidan mahallada aholi bilan ochiq va bevosita muloqotni yo‘lga qo‘yish, fuqarolarning murojaatlarini o‘z vaqtida o‘rganish hamda mavjud muammolarni tegishli tashkilotlar bilan hamkorlikda hal etish muhimligi ta’kidlandi.
O‘rganish yakunida mahallada olib borilayotgan ishlarni yanada takomillashtirish, aholining muammolarini manzilli o‘rganish va ularning qonuniy manfaatlarini ta’minlashga qaratilgan faoliyatni kuchaytirish yuzasidan tegishli tavsiyalar berildi.