Xalq deputatlari Boyovut tumani Kengashining 28-sessiyasida ko‘tarilgan masala yuzasidan tuman Kengashi deputati A. Ibadullayev hamda Kengash kotibiyati bosh mutaxassisi Sh. Suvankulov Boyovut tumani markaziga olib keluvchi D-040 avtomobil yo‘lining 38–43-kilometr oralig‘ida, YHXB binosidan tuman markazigacha bo‘lgan hududda o‘rnatilishi rejalashtirilgan 6 ta zamonaviy yo‘lovchilar kutish bekati loyihalari bilan tanishdi.

O‘rganish jarayonida bekatlarni joylashtirish uchun tanlangan hududlar ko‘zdan kechirilib, ularning fuqarolar uchun qulayligi, shuningdek, yog‘ingarchilik, kuchli shamol va quyosh nurlaridan himoyalanishni ta’minlaydigan zamonaviy talablarga javob berishi yuzasidan muhokamalar olib borildi.

Shuningdek, bekatlar yo‘lovchilar uchun qulay va xavfsiz bo‘lishi, imkon qadar barcha toifadagi fuqarolar, jumladan, keksalar hamda nogironligi bo‘lgan shaxslarning ehtiyojlarini inobatga olgan holda barpo etilishi bo‘yicha taklif va tavsiyalar bildirildi.

Mazkur masala yuzasidan amalga oshiriladigan ishlar deputatlik nazoratida bo‘ladi.