АХБОРОТ-КУТУБХОНА ФАОЛИЯТИ ВА ҚОНУН ТАЛАБЛАРИ ИЖРОСИ ЎРГАНИЛДИ

Халқ депутатлари Янгиқўрғон тумани Кенгаши котибияти мутахассиси Ходжаева Басида томонидан Янгиқўрғон тумани марказий ахборот-кутубхона марказида ўрганиш ишлари олиб борилди.
Ўрганиш жараёнида Ўзбекистон Республикасининг 2011 йил 13 апрелда қабул қилинган «Ахборот-кутубхона фаолияти тўғрисида»ги ЎРҚ–280-сон Қонуни талабларининг муассасадаги ижроси, аҳолига ахборот-кутубхона хизматлари кўрсатиш ҳолати ҳамда китобхонлар учун яратилган шарт-шароитлар атрофлича таҳлил қилинди.
Хусусан, кутубхона фондини шакллантириш, сақлаш, ҳисобга олиш ва мунтазам бойитиб бориш, мавжуд адабиётлардан самарали фойдаланиш, китобларнинг сақланиш ҳолати ҳамда уларни китобхонларга белгиланган тартибда етказиб бериш масалаларига алоҳида эътибор қаратилди.
Шунингдек, аҳолига, айниқса, ёшлар, ўқувчилар, талабалар, педагоглар ва турли соҳа вакилларига сифатли ахборот-кутубхона хизматлари кўрсатиш, уларнинг илмий, маърифий, маданий ва ахборотга бўлган эҳтиёжларини қондириш борасида амалга оширилаётган ишлар ўрганилди.
Ўрганиш давомида қуйидаги йўналишларга эътибор қаратилди:
🔹 кутубхона фондидаги адабиётлар сони, таркиби ва уларнинг мавзулар бўйича жойлаштирилиши;
🔹 янги нашрлар, бадиий, илмий-оммабоп, ҳуқуқий ва маърифий адабиётлар билан фондни бойитиш ҳолати;
🔹 китобхонларни рўйхатга олиш, уларга адабиётларни бериш ва қайтариб олиш жараёни;
🔹 электрон каталог ва рақамли ахборот ресурсларидан фойдаланиш имкониятлари;
🔹 интернет тармоғи, компьютер техникаси ва электрон маълумотлар базалари билан ишлаш учун яратилган шароитлар;
🔹 ногиронлиги бўлган шахслар, кекса авлод ва бошқа ижтимоий ҳимояга муҳтож аҳоли қатламларига кутубхона хизматларини кўрсатиш ҳолати;
🔹 китобхонликни тарғиб қилишга қаратилган маънавий-маърифий тадбирлар, давра суҳбатлари, учрашувлар, танловлар ва китоб тақдимотларининг ташкил этилиши;
🔹 ёшларнинг бўш вақтларини мазмунли ташкил этиш, улар ўртасида китоб мутолаасига қизиқишни ошириш бўйича амалга оширилаётган ишлар.
Масъуллар билан ўтказилган мулоқот давомида ахборот-кутубхона хизматларини замонавий талаблар асосида ташкил этиш, электрон хизматлар кўламини кенгайтириш, аҳолига тезкор ва ишончли ахборот етказиш ҳамда кутубхонага китобхонларни жалб қилиш масалалари муҳокама қилинди.
Шу билан бирга, кутубхона ходимларининг касбий малакасини ошириш, китоб фондини янги адабиётлар билан мунтазам тўлдириб бориш, аҳоли ўртасида китобхонлик маданиятини юксалтириш ва ёш авлоднинг маънавий-интеллектуал салоҳиятини ошириш бўйича таклифлар билдирилди.
Ўрганиш якунлари бўйича аниқланган масалаларни бартараф этиш, ахборот-кутубхона хизматлари сифатини янада яхшилаш, электрон ва анъанавий ахборот ресурсларидан фойдаланиш имкониятларини кенгайтириш ҳамда Қонун талаблари ижросини тўлиқ таъминлаш юзасидан масъулларга тегишли тавсиялар берилди.
📖 Зеро, кутубхона — аҳолининг маънавий дунёқарашини бойитиш, билим ва тафаккурини юксалтиришга хизмат қилувчи муҳим маърифат масканидир.