#deputat_faoliyati

Xalq deputatlari Toshkent viloyati Kengashi deputati Gulnora Ahmedova Qibray tumanida Investitsiya dasturi doirasida rekonstruksiya qilinib, foydalanishga topshirilgan davlat maktabgacha ta’lim tashkiloti faoliyati bilan tanishdi.

Mazkur ta’lim muassasasi 8,5 milliard so‘m mablag‘ evaziga zamonaviy talablarga mos ravishda qayta qurilib, foydalanishga topshirildi. Amalga oshirilgan bunyodkorlik ishlari natijasida bog‘chaning quvvati 126 o‘rindan 330 o‘ringacha kengaytirildi. Bu esa hududdagi yuzlab bolajonlarning sifatli maktabgacha ta’lim va tarbiya bilan qamrab olinishi uchun keng imkoniyat yaratdi.

Shuningdek, muassasada 20 ta yangi ish o‘rni tashkil etilib, mahalliy aholi bandligini ta’minlashga ham munosib hissa qo‘shildi.

Deputat Gulnora Ahmedova muassasada yaratilgan sharoitlar, o‘quv-tarbiya jarayonlari, bolalar uchun tashkil etilgan zamonaviy xonalar hamda pedagoglar faoliyati bilan yaqindan tanishdi. Muloqotlar davomida maktabgacha ta’lim sifatini yanada oshirish, bolalarning har tomonlama rivojlanishi uchun qulay muhit yaratish masalalariga alohida e’tibor qaratildi.

Yangi davlat maktabgacha ta’lim tashkilotining foydalanishga topshirilishi Qibray tumanida maktabgacha ta’lim qamrovini kengaytirish, yosh avlodning sifatli ta’lim olishi hamda ularning barkamol voyaga yetishi yo‘lidagi muhim qadamlardan biri bo‘ldi.